ध्रुव बस्याल ##
जन्म र मृत्यु जीवनका अपरिहार्य सत्य हुन् तर केही मानिस यस्ता हुन्छन्, जो शारीरिक रूपमा बिदा भए पनि आफ्ना विचार, कर्म र योगदानका कारण कहिल्यै मर्दैनन् । उनीहरू जनताको मनमा, समाजको स्मृतिमा र इतिहासका पानामा सधैँ जीवित रहन्छन् । स्वर्गद्वारी नगरपालिकाका उपप्रमुख, राष्ट्रिय जनमोर्चाका नेता, नेकपा (मसाल) प्युठान सचिवालय सदस्य तथा विभिन्न जनवर्गीय मोर्चामा सक्रिय भूमिका निर्वाह गर्नुभएका मीनराज रानामगर त्यस्तै दुर्लभ व्यक्तित्व हुनुहुन्थ्यो ।
आज पनि मनले उहाँको निधन स्वीकार्न सकेको छैन । केही दिनअघि मात्रै बजेट, विकास र स्वर्गद्वारीको भविष्यबारे उहाँसँग आत्मीय कुराकानी भएको थियो । हाँस्दै, नयाँ योजनाका सपना बाँड्दै फोनबाट बिदा भएका हामी, यति छिट्टै उहाँकै सम्झनामा श्रद्धाञ्जली लेख्नुपर्ने दिन आउला भन्ने कल्पना पनि गरेका थिएनौँ । साँच्चै, जीवन कति अनिश्चित रहेछ ? कहिलेकाहीँ “फेरि भेटौँला” भनेर छुट्टिएको संवाद नै जीवनको अन्तिम संवाद बन्न पुग्दो रहेछ ।
धनबाङको माटोमा जन्मिएका मीनराज रानामगरले आफ्नो जीवन कहिल्यै आफ्ना लागि मात्र बाँच्नुभएन । सामाजिक भाव बोकेका युवा समाज परिवर्तनको यात्रा सङ्घर्ष, विचार र जनसेवाप्रतिको अटुट निष्ठाले भरिएको थियो । उहाँका लागि राजनीति अवसरको भर्याङ थिएन, जनताको सेवाको बाटो थियो । पार्टीले दिएको प्रत्येक जिम्मेवारी उहाँले इमानदारीपूर्वक पूरा गर्नुभयो । सङ्गठनको हितलाई व्यक्तिगत स्वार्थभन्दा माथि राख्ने उहाँको जीवनशैली नै उहाँको सबैभन्दा ठुलो परिचय बन्यो ।
२०७४ सालको स्थानीय तह निर्वाचनमा स्वर्गद्वारी नगरपालिका–२ को वडाअध्यक्ष निर्वाचित भएपछि उहाँले विकासलाई भाषणमा होइन, व्यवहारमा उतार्नुभयो । गाउँगाउँ पुगेर जनताको कुरा सुन्ने, विकासका योजना आफैँ अनुगमन गर्ने र सानोभन्दा सानो समस्यालाई पनि आफ्नै जिम्मेवारी ठान्ने उहाँको कार्यशैलीले जनताको मन जित्यो । यही विश्वासले उहाँलाई पछि उपप्रमुखको जिम्मेवारीसम्म पुर्यायो ।
उपप्रमुख भएपछि पनि उहाँमा पदको कुनै अहङ्कार देखिएन । उहाँ कार्यालयभन्दा जनतामाझ बढी देखिनुहुन्थ्यो । विकासका योजना कागजमा सम्पन्न भएको होइन, जनताको जीवनमा परिवर्तन आएको हेर्न चाहनुहुन्थ्यो । विडम्बना ! जीवनको अन्तिम दिन पनि उहाँ जनताकै काममा, योजनाको अनुगमनमा निस्किनुभएको थियो तर नियतिले अर्को निर्णय गरिसकेको रहेछ । स्वर्गद्वारी–२ बाङ्गेसल्लाको भिरमा भएको सवारी दुर्घटनाले एउटा असल जनप्रतिनिधिको जीवनयात्रा त्यहीँ रोकिदियो ।
यो केवल एउटा दुर्घटना थिएन, जनताको सेवामा समर्पित एउटा जीवन कर्तव्यकै मैदानमा रोकिएको क्षण थियो । उहाँ केवल नेता मात्र हुनुहुन्थेन, उहाँ अभिभावक हुनुहुन्थ्यो, सहयोद्धा हुनुहुन्थ्यो, साथी हुनुहुन्थ्यो । निराश मनलाई हौसला दिने, अप्ठ्यारोमा साथ दिने र जनताको दुःखलाई आफ्नै दुःख सम्झने दुर्लभ मानिस हुनुहुन्थ्यो । उहाँसँग ठुलो पदको लोभ थिएन, व्यक्तिगत महत्त्वाकाङ्क्षा थिएन । उहाँको सबैभन्दा ठुलो सम्पत्ति जनताको माया, विश्वास र सम्मान थियो ।
जीवनले उहाँलाई धेरै पीडा पनि दियो । प्रतिभाशाली भाइ भीम रानामगरको असामयिक निधन, त्यसपछि अर्को भाइ योगेशको बिछोड । यी घटनाले उहाँलाई पटकपटक भित्रैदेखि भत्कायो तर आफ्ना व्यक्तिगत पीडालाई मनभित्रै दबाएर उहाँ समाज, पार्टी र जनताप्रतिको जिम्मेवारीबाट कहिल्यै पछि हट्नुभएन । सायद त्यसैले उहाँ सबैका लागि नेता मात्र होइन, भरोसाको अर्को नाम बन्नुभयो ।
आज उहाँको बिदाइसँगै तीन छोराले आफ्ना पिता गुमाएका छन् । परिवारले आफ्नो अभिभावक गुमाएको छ । धनबाङले आफ्नो असल छोरा गुमाएको छ । स्वर्गद्वारीले जनताको प्रिय उपप्रमुख गुमाएको छ । पार्टीले एउटा निष्ठावान् सिपाही गुमाएको छ । हामी सबैले एउटा आत्मीय सहयात्री गुमाएका छौँ । बारम्बार मनमा एउटा प्रश्न उठ्छ, त्यो अन्तिम यात्रामा तपाईंले के सोच्नुभयो होला ? अझै कति योजना बाँकी थिए, कति सपना अधुरा थिए तर अब ती सबै प्रश्न सधैँका लागि अनुत्तरित रहनेछन् ।
आज पनि त्यो अन्तिम संवाद, त्यो आत्मीय मुस्कान र विकासका योजनाबारे गरेका कुरा स्मृतिमा ताजै छन् । समयले शरीरलाई हामीबाट टाढा लैजान सक्छ तर यस्ता सम्झना कहिल्यै मेट्न सक्दैन । प्रिय सहयोद्धा, तपाईं आज हामीबिच शारीरिक रूपमा हुनुहुन्न तर तपाईंले देखाउनुभएको इमानदारी, सादगी, सङ्घर्ष, जनताप्रतिको समर्पण र निष्ठा सधैँ जीवित रहनेछ । तपाईंको जीवनले हामीलाई एउटा ठुलो पाठ सिकाएको छ । राजनीति पदका लागि होइन, जनताको सेवाका लागि हुनुपर्छ । साँचो नेता भाषणले होइन, कर्मले चिनिन्छ । तपाईंले छोडेर जानुभएका अधुरा सपनालाई पूरा गर्ने प्रयास नै तपाईंप्रतिको सच्चा श्रद्धाञ्जली हुनेछ । तपाईंले देखाउनुभएको बाटोमा हिँड्ने सङ्कल्पसहित, अलविदा, प्रिय सहयोद्धा मीनराज रानामगर ।
तपाईंको शरीर हामीबाट टाढिएको होला तर तपाईंका विचार, तपाईंको सङ्घर्ष र तपाईंले कमाएको सम्मान सधैँ हाम्रो मनमा जीवित रहनेछ । भावपूर्ण हार्दिक श्रद्धाञ्जली ! लालसलाम, प्रिय सहयोद्धा !
