प्यूठान । स्वर्गद्वारी नगरपालिकाका उपप्रमुख मिनराज रानामगरको सडक दुर्घटनामा असामयिक निधन भएपछि स्वर्गद्वारी नगरपालिकाले गहिरो दुःख व्यक्त गर्दै श्रद्धाञ्जली अर्पण गरेको छ।
नगरपालिकाका अनुसार २०८३ साल असार १३ गते वडा नं. २ वाङ्गेसल्लामा भएको दुःखद सडक दुर्घटनामा परी उपप्रमुख रानामगरको निधन भएको हो। उहाँको निधनले नगर परिवार, नगरवासी तथा स्थानीय तह स्तब्ध, मर्माहत र शोकमग्न बनेको नगरपालिकाले जनाएको छ।
नगरपालिकाले असार १४ गते बिहान ९ बजे बसेको नगर कार्यपालिकाको आकस्मिक बैठकबाट दिवङ्गत उपप्रमुख रानामगरप्रति भावपूर्ण श्रद्धाञ्जली व्यक्त गर्दै उहाँको आत्माको चिरशान्तिको कामना गरेको छ। साथै, शोकसन्तप्त परिवार, आफन्त तथा शुभचिन्तकप्रति हार्दिक समवेदना प्रकट गर्दै धैर्य धारण गर्ने शक्ति प्राप्त होस् भन्ने कामना गरिएको छ।
श्रद्धाञ्जली सन्देशमा उपप्रमुख रानामगरले नगरपालिकाको विकास, समृद्धि, न्याय सम्पादन तथा नगरवासीको हक–हित संरक्षणका लागि पुर्याएको योगदान, निष्ठा र जनप्रिय नेतृत्व सधैं स्मरणीय रहने उल्लेख गरिएको छ। उहाँको असामयिक निधनले नगरपालिकाले एक कर्मठ, प्रखर र अभिभावकीय नेतृत्व गुमाएको तथा स्थानीय तहलाई अपूरणीय क्षति पुगेको नगरपालिकाको भनाइ छ।
नगरपालिकाले श्रद्धाञ्जली सन्देशको अन्त्यमा, “मृत्यु सत्य हो, तर उहाँले छोडेर जानुभएका असल कार्य र आदर्शहरू हाम्रा लागि सधैं प्रेरणाको स्रोत बनिरहने छन्” भन्दै दिवङ्गत उपप्रमुख रानामगरप्रति उच्च सम्मान व्यक्त गरेको छ।
