प्युठान । एउटा परिवार, तीन सक्रिय राजनीतिकर्मी दाजुभाइ, र सात वर्षको अन्तरालमा लगातार तीन शोक । यस्तो पीडादायी घटनाले प्युठानको स्वर्गद्वारी नगरपालिका–२ धनवाङ, खाल मात्रै होइन, समग्र जिल्लालाई नै स्तब्ध बनाएको छ ।
शनिबार स्वर्गद्वारी नगरपालिकाका उपप्रमुख मीनराज राना मगरको सवारी दुर्घटनामा निधन भएपछि राना परिवारले आफ्ना तीन भाइलाई अल्पायुमै गुमाएको दुःखद अध्याय पूरा भएको छ । यसअघि साइला भाइ भीम राना मगर र माइला भाइ योगेश राना मगरको पनि कम उमेरमै निधन भइसकेको थियो ।
सेवाकै क्रममा अन्तिम यात्रा
५० वर्षीय मीनराज राना मगर २०७९ सालको स्थानीय तह निर्वाचनमा नेपाली काँग्रेससँगको गठबन्धनबाट राष्ट्रिय जनमोर्चाका तर्फबाट स्वर्गद्वारी नगरपालिकाको उपप्रमुखमा निर्वाचित भएका थिए । उनी राष्ट्रिय जनमोर्चाको जिल्ला सचिवालय सदस्यसमेत थिए ।
शनिबार पोषण कार्यक्रमको अनुगमन सकेर आफैं गाडी चलाउँदै फर्किने क्रममा भएको दुर्घटनामा उनको ज्यान गएको हो । वाङ्गेसल्ला स्थायी घर भए पनि उनी सानो व्यवसाय सञ्चालन गर्दै जलुके क्षेत्रमा बसोबास गर्दै आएका थिए ।
स्थानीयका अनुसार मीनराज सरल, मिलनसार र जनताका समस्यामा जुनसुकै बेला पनि उपस्थित हुने जनप्रतिनिधिका रूपमा परिचित थिए ।
सात वर्षमा तीन भाइ गुमायो परिवार
मीनराज राना मगर राना परिवारका जेठा सन्तान थिए । उनीभन्दा पहिले नै उनका दुई भाइको पनि असामयिक निधन भइसकेको थियो ।
२०७५ साल असोजमा ३८ वर्षको उमेरमा साइला भाइ भीम राना मगरको हृदयघातका कारण निधन भएको थियो । त्यसको करिब अढाई वर्षपछि २०७७ साल चैतमा माइला भाइ योगेश राना मगरको ४१ वर्षको उमेरमा जन्डिसका कारण मृत्यु भएको थियो ।
तीनै भाइ समाजसेवा र राजनीतिमा सक्रिय थिए । सात वर्षभित्रै तीनै जनाको निधन भएपछि राना परिवारमाथि परेको पीडालाई स्थानीयले ॅबज्रपात’को संज्ञा दिएका छन् ।
राजनीतिमा छुट्टै पहिचान
राना परिवारका तीनै दाजुभाइले राष्ट्रिय जनमोर्चाको राजनीतिमा महत्वपूर्ण भूमिका निर्वाह गरेका थिए ।
भीम राना मगर विद्यार्थी राजनीतिबाट उदाएका नेता थिए । उनी अखिल (छैटौं) का जिल्ला अध्यक्ष हुँदै केन्द्रीय सचिवालय सदस्यसम्म पुगेका थिए । उनी रक्तिम सांस्कृतिक अभियानसँग पनि आबद्ध थिए ।
योगेश राना मगर पनि संगठन निर्माण र सामाजिक अभियानमा सक्रिय थिए । मीनराज भने जनप्रतिनिधिका रूपमा जनताको दैनिक समस्या समाधानमा निरन्तर खटिने नेताका रूपमा चिनिन्थे ।
युवक संघ प्युठानका नेता कुवेर भण्डारीका अनुसार प्युठानमा नेकपा (मसाल) को राजनीतिमा मीनराज, योगेश र भीम राना मगर अग्रपंक्तिमा गनिने नाम थिए ।
पालिकाले गुमायो जनताको नेता
स्वर्गद्वारी नगरपालिका–२ का वडाध्यक्ष बुद्धिराम पुनका अनुसार मीनराज राना मगर नागरिकको सेवामा सधैं अग्रसर रहने जनप्रतिनिधि थिए ।
उनले जनताको सेवाभन्दा ठूलो जिम्मेवारी अरू केही नठान्ने स्वभावका मीनराजको असामयिक निधनले स्वर्गद्वारी नगरपालिका मात्र होइन, समग्र जिल्लाको राजनीतिक र सामाजिक क्षेत्रमा ठूलो क्षति पुगेको बताए ।
शोकमा परिवार र गाउँ
राना परिवारमा अहिले कान्छा भाइ लोकेन्द्र राना मगर र बहिनी मनिषा राना मगर छन् । दिवंगत मीनराजका श्रीमती र तीन छोरा छन् ।
एकपछि अर्को गर्दै तीन सक्रिय दाजुभाइलाई गुमाउनु केवल एउटा परिवारको पीडा मात्र होइन, समाजसेवा र राजनीतिमा सक्रिय एउटा पुस्ताको असामयिक अन्त्य पनि हो । उनीहरूले समाज परिवर्तनका लागि देखाएको प्रतिबद्धता र जनतासँग बनाएको सम्बन्ध अहिले पनि स्थानीयका स्मृतिमा जीवित छ । तर सात वर्षभित्रै तीनै दाजुभाइको असामयिक निधनले राना परिवारसँगै प्युठानको राजनीतिक वृत्तलाई गहिरो शोकमा डुबाएको छ ।
