काठमाडौँ, असार १३ । प्युठानको स्वर्गद्वारी नगरपालिकाका उपप्रमुख मिनराज रानाको सवारी दुर्घटनामा परी निधन भएको छ।
शनिबार दिउँसो स्वर्गद्वारीबाट धनवाङतर्फ जाँदै गरेको लु.प्र. ०१–००१ झ ०००८ नम्बरको सरकारी गाडी अनियन्त्रित भई करिब ५०० मिटर तल भीरमा खस्दा रानाको निधन भएको स्थानीय जनप्रतिनिधि गिरीबहादुर गुरुङले जानकारी दिनुभयो।
५० वर्षीय उपमेयर मिनराज राना मगरले आफैले चलाएको गाडी झन्डै ५०० मिटर भन्दा मुनि पुगेर रूखमा अड्किएको अवस्थामा फेला परेको खबर गाई गोठालाहरूले दिएको जिल्ला प्रहरी प्रवक्ता प्रहरी प्रशासनमा जानकारी दिएको गुरुङले हामीलाई बताए ।
घटनास्थलबाट गुरुङले दिएको जानकारीअनुसार, राना स्वर्गद्वारी नगरपालिका–२ स्थित बाङ्गेसल्लामा एक कार्यक्रम सम्पन्न गरी नगरपालिकातर्फ फर्किने क्रममा खाला भन्ने स्थानमा गाडी दुर्घटनामा परेको थियो।
गुरुङका अनुसार घटनास्थलमा प्रहरी तथा स्थानीय बासिन्दा पुगेका छन्। गाडीले रानालाई च्यापेको अवस्थामा रहेकाले उनलाई बाहिर निकाल्न गाडी काट्नुपर्ने अवस्था रहेको छ।
उपप्रमुख मिनराज रानाका श्रीमती र तीन छोरा रहेका छन्।
