विराटनगर । नेपाल कम्युनिस्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ले नेकपा र नेपाल कम्युनिस्ट पार्टी (एकीकृत मार्क्सवादी–लेनिनवादी) (एमाले) बीच संसद्, सडक र स्थानीय तहमा सहकार्यका विषयमा छलफल भइरहेको बताएका छन्। उनले तत्काल पार्टी एकता नहुने स्पष्ट पार्दै वामपन्थी शक्तिबीचको सहकार्यले वैकल्पिक राजनीतिक शक्ति निर्माणमा टेवा पुग्ने बताए।
विराटनगरमा शुक्रबार आयोजित नेकपाको एकता बैठक तथा प्रशिक्षण कार्यक्रममा उनले कम्युनिस्ट आन्दोलनलाई पुनः एकताबद्ध र सुदृढ बनाउन आवश्यक रहेको उल्लेख गरे। साथै, वर्तमान सरकारले विपन्न, दलित, महिला र सुकुमवासी समुदायका पक्षमा प्रभावकारी काम गर्न नसकेको आरोप लगाए।
दाहालले निर्वाचन निष्पक्ष नभएको दाबी गर्दै केही अन्तर्राष्ट्रिय शक्तिले नेपालको राजनीतिक उपलब्धिमाथि प्रभाव पार्न खोजेको आरोप पनि लगाए। उनले कम्युनिस्ट आन्दोलनमा रणनीतिक कमजोरी भएको स्वीकार गर्दै विचार र संगठनलाई थप सुदृढ बनाउनुपर्नेमा जोड दिए।
उनले नयाँ पुस्तालाई नेतृत्वमा अघि ल्याउने तयारी भइरहेको जानकारी दिँदै आवश्यकता अनुसार अन्य राजनीतिक दलसँग पनि सहकार्य गर्न सकिने संकेत गरे।
