काठमाडौं, असार १२। राष्ट्रिय सभाको बैठकको विशेष समयमा बोल्दै सांसद तुलप्रसाद विश्वकर्माले वर्तमान सरकारका विभिन्न निर्णय र गतिविधिमाथि गम्भीर प्रश्न उठाउँदै सरकारको ध्यानाकर्षण गराउनुभएको छ। उहाँले भारतसँग गरिएको सपुर्दगी सन्धि, सुकुम्बासी व्यवस्थापन, दलित समुदायको आन्दोलन तथा अपाङ्गता भएका व्यक्तिमाथि गरिएको व्यवहारलगायत विषयमा सरकारको आलोचना गर्नुभयो।

सांसद विश्वकर्माले भारतसँग गरिएको सपुर्दगी सन्धि नेपालको हितभन्दा भारतको हितमा केन्द्रित रहेको दाबी गर्नुभयो। सरकारले यसलाई “सन्धि” नभई “सम्झौता” भनेर जनतालाई भ्रममा पार्न खोजेको आरोप लगाउँदै उहाँले भन्नुभयो, “यस्तो निर्णयले नेपालको राष्ट्रिय स्वाधीनता र सार्वभौमिकतामा दीर्घकालीन असर पर्नेछ।”

उहाँले नेपालको तुलनामा भारतको जनसंख्या अत्यधिक भएकाले भविष्यमा भारतीय अपराधी नेपालमा लुक्ने र उनीहरूको खोजीका नाममा ठूलो संख्यामा भारतीय सुरक्षाकर्मी नेपाल प्रवेश गर्न सक्ने सम्भावनाप्रति चिन्ता व्यक्त गर्नुभयो। यस्तो अवस्थाले नेपालको सुरक्षा र सार्वभौमिकतामाथि नकारात्मक असर पर्न सक्ने उहाँको भनाइ थियो।

सांसद विश्वकर्माले सुकुम्बासी समस्या समाधानमा सरकारको कार्यशैलीको पनि आलोचना गर्नुभयो। “वैकल्पिक व्यवस्थापन नगरी डोजर प्रयोग गरेर बस्ती हटाइयो र पछि होल्डिङ सेन्टरमा राखिएका परिवारलाई प्रतिपरिवार २५ हजार रुपैयाँ दिएर त्यहाँबाट हटाउने प्रयास गरियो,” भन्दै उहाँले त्यसपछि उनीहरूको जीवनयापनको जिम्मेवारी पनि सरकारले लिनुपर्नेमा जोड दिनुभयो।

यस्तै, महोत्तरीको मनहरी क्षेत्रमा लामो समयदेखि बसोबास गर्दै आएका दलित समुदायले आफ्ना माग राख्दै आन्दोलन गरिरहेको भए पनि सरकारले त्यसतर्फ बेवास्ता गरेको उहाँको आरोप थियो।

विश्वकर्माले हाल प्रदर्शन भइरहेको एक चलचित्रप्रति बादी समुदायले जातीय अपमान भएको भन्दै विरोध गरिरहेको उल्लेख गर्दै सरकारले आन्दोलनरत समुदायसँग संवाद गरी समस्या समाधान गर्नुपर्ने बताउनुभयो। यदि चलचित्रमा आपत्तिजनक सामग्री रहेको प्रमाणित भए त्यस्तो चलचित्रमाथि प्रतिबन्ध लगाउन पनि सरकार तयार हुनुपर्ने उहाँको धारणा थियो।

त्यसैगरी, अपाङ्गता भएका व्यक्तिहरूले जीविकोपार्जनका लागि सडकमा सामान बिक्री गर्दा उनीहरूमाथि गरिएको दमन र पक्राउप्रति पनि सांसद विश्वकर्माले आपत्ति जनाउनुभयो। पक्राउ परेकाहरूलाई तत्काल रिहा गर्न, उनीहरूको सुनुवाइ गर्न तथा वैकल्पिक जीविकोपार्जनको व्यवस्था गर्न उहाँले सरकारसँग माग गर्नुभयो।

अन्त्यमा सांसद विश्वकर्माले राष्ट्रिय हित, सामाजिक न्याय तथा नागरिकका आधारभूत अधिकारसँग सम्बन्धित विषयमा सरकार गम्भीर बन्नुपर्ने आवश्यकता औँल्याउँदै आफ्ना सबै मागप्रति तत्काल ध्यान दिन सरकारसँग आग्रह गर्नुभयो।