काठमाडौँ । राष्ट्रिय जनमोर्चाले प्रदेशसभा खारेज गर्नेसम्बन्धी राष्ट्रिय स्वतन्त्र पार्टीको निर्णयलाई सकारात्मक बताएको छ ।
कार्यवाहक अध्यक्ष रश्मिराज नेपालीको हस्ताक्षरमा २०८३ असार १२ गते प्रेसवक्तव्य जारी गर्दै राजमोले सो धारणा व्यक्त गरेको हो ।
प्रदेशसभा खारेज गर्ने निर्णयबाट प्रशासनिक संरचनालाई सरल बनाउन, आर्थिक व्यवभार घटाउन र विद्यमान संरचनाको पुनरवलोकनसम्बन्धी बहसलाई बल पुग्ने पार्टीको ठहर छ ।
त्यस्तै रास्वपाको महाधिवेशन दस्तावेजमा धर्मनिरपेक्षताबारे मौन रहनुबाट राजनीतिक संशय उत्पन्न भएको वक्तव्यमा उल्लेख छ । यस सम्बन्धमा रास्वपाले राजावादी वा भारतको संस्थापन पक्षसँग नजिक हुने सम्भावनातर्फ राजमोले इङ्गित गरेको छ ।
यस्तो छ, प्रेसवक्तव्यको पूर्ण पाठ :
“राष्ट्रिय स्वतन्त्र पार्टीको महाधिवेशनबाट पारित भएका केही निर्णयप्रति हाम्रो पार्टी राष्ट्रिय जनमोर्चाको गम्भीर ध्यानाकर्षण भएको छ । यस सन्दर्भमा हाम्रो धारणा निम्नानुसार सार्वजनिक गर्दछौँ ।
राष्ट्रिय स्वतन्त्र पार्टीको महाधिवेशनले प्रदेश सभा खारेज गर्ने प्रस्तावलाई अनुमोदन गरेको छ । हाम्रो पार्टीले उक्त निर्णयलाई सकारात्मक रूपमा लिन्छ । प्रदेशसभाको खारेजीले राज्यको प्रशासनिक संरचनालाई सरल बनाउन, अनावश्यक रूपमा बढ्दै गएको आर्थिक व्ययभार घटाउन तथा मुलुकमा विद्यमान संरचनाको पुनरावलोकनसम्बन्धी बहसलाई थप बल पुर्याउने विश्वास हाम्रो पार्टीको छ ।
लोकतान्त्रिक गणतन्त्र, धर्मनिरपेक्षता र समावेशिता २०६२–६३ को जनआन्दोलनका ऐतिहासिक उपलब्धि मात्र नभई नेपालको वर्तमान संविधानका आधारभूत स्तम्भ पनि हुन् तर राष्ट्रिय स्वतन्त्र पार्टीको महाधिवेशनले धर्मनिरपेक्षताको विषयमा कुनै स्पष्ट धारणा सार्वजनिक नगर्नुले गम्भीर राजनीतिक संशय उत्पन्न गरेको छ । यस्तो मौनता धर्मनिरपेक्षताप्रतिको प्रतिबद्धतामा अस्पष्टता मात्र नभई राजावादी शक्ति वा भारतको संस्थापन पक्षसँग निकट राजनीतिक दृष्टिकोण अवलम्बन गर्ने सम्भावना बलियो देखिन्छ । हाम्रो पार्टी धर्मनिरपेक्षता कमजोर पार्ने वा त्यस विरुद्ध हुने कुनै पनि प्रकारका षड्यन्त्र, प्रयास वा राजनीतिक गतिविधिलाई स्वीकार गर्ने छैन र संविधानका यी उपलब्धिको दृढतापूर्वक रक्षा गर्न प्रतिबद्ध रहनेछ ।”
