काठमाडौं । प्रदेश नम्बर २ का आन्तरिक मामिला मन्त्री ज्ञानेन्द्र यादवलाई कोरोना संक्रमण देखिएको छ । बुधबार साँझ आएको कोरोना परीक्षण रिपोर्टअनुसार यादवमा संक्रमण पुष्टि भएको हो ।

मन्त्री यादवले केही दिन अघि मात्रै प्रधानमन्त्री केपी शर्मा ओलीलाई भेटघाट गर्नुभएको थियो । प्रहरी समायोजन सम्बन्धी छलफलका लागि जनकपुरबाट काठमाडौं आएका यादवसमेत प्रधानमन्त्री, गृहमन्त्री, सातवटै प्रदेशका आन्तरिक मामिला मन्त्री, प्रहरी प्रमुखलगायतको बैठक भएको थियो ।

सोही बैठकमा सहभागी यादवलाई जनकपुर फर्किएलगत्तै कोरोना संक्रमण देखिएको थियो । साउन १६ गतेको बैठक पछि अर्को दिन (१७ गते) जनकपुर फर्किनुभएका मन्त्री यादवलाई संक्रमण देखिएको हो । बैठकपछि सामूहिकरुपमा खिचिएको तस्बिर खिचाउँदा प्रधानमन्त्री, गृहमन्त्री, गृहसचिव, प्रहरी प्रमुख कसैले पनि मास्कसमेत लगाएका छैनन् ।

मन्त्री यादवसँगै उहाँले सम्हालेको मन्त्रालयका आठ कर्मचारीमा समेत कोरोना संक्रमण देखिएको छ । उहाँसँगै प्रदेश २ का मन्त्री, मेयर तथा सांसदहरूलाई कोरोना संक्रमण देखिएको छ । वीरगन्ज महानगरपालिकाका प्रमुख विजय सरावगी र सोही क्षेत्रबाट निर्वाचित प्रतिनिधिसभा सदस्य प्रदीप यादवलाई पनि कोरोना संक्रमण देखिएको छ ।

प्रदेश २ मा हालसम्म कोरोना संक्रमितको संख्या पाँच हजार नाघिसकेको छ । पाँच हजार दुई सय ७२ संक्रमितमध्ये निको भएर अस्पतालबाट तीन हजार दुई सय ३२ जना घर फर्किएका छन् ।