काठमाडौं । राष्ट्रिय स्वतन्त्र पार्टी (रास्वपा) को चितवनमा जारी पहिलो महाधिवेशनमा नयाँ नेतृत्व चयनका लागि भएको मतदानमा अपेक्षाकृत कम सहभागिता देखिएको छ।
कुल ४,३११ महाधिवेशन प्रतिनिधिमध्ये २,९५९ जनाले मात्र मतदान गरेका छन् भने १,३५२ प्रतिनिधिले मतदान नगरी फर्किएका छन्।
९९ सदस्यीय केन्द्रीय समितिका लागि ३८४ जनाले उम्मेदवारी दिएका छन्। विद्युतीय मतदान प्रणालीमार्फत मतदान भएकाले मतपरिणाम छिट्टै आउने अपेक्षा गरिएको छ। त्यसपछि पदाधिकारी चयनका लागि दोस्रो चरणको मतदान हुने कार्यतालिका छ।
यसबीच केही उम्मेदवारले निर्वाचन प्रक्रिया नै विवादास्पद बनेको आरोप लगाएका छन्। उम्मेदवारको क्रमसंख्या, क्लस्टर तथा वर्णानुक्रम परिवर्तन गरिएको, मतदान प्रणालीमा त्रुटि गरिएको र केही पक्षले आफ्ना उम्मेदवारलाई जिताउन ‘सिफारिस सूची’ (चिट) वितरण गरेको आरोप सामाजिक सञ्जालमार्फत सार्वजनिक भएको छ।
महाधिवेशन प्रतिनिधिको सूची अन्तिम समयसम्म टुंगो नलाग्नु, मतदान प्रक्रियामा देखिएको अव्यवस्था तथा निर्वाचनसम्बन्धी आरोप–प्रत्यारोपका कारण महाधिवेशन व्यवस्थापनमाथि प्रश्न उठेको छ।
