अध्यक्ष केपी शर्मा ओलीको निवास गुण्डुमा मंगलबार राति बसेको एमाले सचिवालय बैठकले पौडेलको गिरफ्तारीलाई राजनीतिक प्रतिशोध, पूर्वाग्रहपूर्ण तथा गैरकानुनी कदमको संज्ञा दिएको छ।
बैठकपछि सचिव महेश बस्नेतले जारी गरेको जानकारीअनुसार बिनावस्तुगत तथ्य र प्रमाण राजनीतिक उद्देश्यले गरिएको उक्त कदमको राजनीतिक र कानुनी दुवै रूपमा सशक्त प्रतिवाद गर्ने निर्णय गरिएको छ।
एमालेले पौडेलको अविलम्ब बिनासर्त रिहाइको माग गर्दै लोकतान्त्रिक मूल्य, विधिको शासन तथा नागरिक अधिकारमाथि हुने हस्तक्षेपविरुद्ध देशव्यापी राजनीतिक प्रतिरोध र भण्डाफोर अभियान सञ्चालन गर्ने जनाएको छ। साथै, पार्टीका सम्पूर्ण नेता–कार्यकर्ता तथा न्यायप्रेमी नागरिकलाई उक्त अभियानमा सहभागी हुन आह्वान गरिएको छ।
सम्पत्ति शुद्धीकरणसम्बन्धी मुद्दामा सोमबार सुर्खेतबाट पक्राउ परेका पौडेललाई विशेष अदालत काठमाडौंले मंगलबार सात दिन हिरासतमा राखेर अनुसन्धान गर्न अनुमति दिएको छ।
