काठमाडौं, असार १० । अमेरिकी सिनेटले इरानविरुद्ध सैन्य कारबाही अघि कांग्रेसको स्वीकृति लिनुपर्ने र युद्ध रोक्नुपर्ने प्रस्ताव पारित गरेको छ। रिपब्लिकन पार्टीको बहुमत रहेको सिनेटमा भएको मतदानमा प्रस्तावको पक्षमा ५० र विपक्षमा ४८ मत परेको थियो।
डेमोक्र्याट्ससँगै केही रिपब्लिकन सांसदहरूले पनि प्रस्तावको समर्थन गरेपछि यसलाई राष्ट्रपति डोनाल्ड ट्रम्पका लागि राजनीतिक झट्काका रूपमा हेरिएको छ। रिपब्लिकन सिनेटर र्यान्ड पल, लिसा मर्कोव्स्की, सुसान कोलिन्स र बिल क्यासिडीले डेमोक्र्याटहरूसँग मिलेर प्रस्तावको पक्षमा मतदान गरेका थिए। यता, डेमोक्र्याट सिनेटर जोन फेटरम्यानले भने प्रस्तावको विपक्षमा मत दिएका थिए।
यसअघि यही प्रस्ताव प्रतिनिधिसभाबाट पनि पारित भइसकेको थियो। यद्यपि, यो प्रस्तावलाई मुख्यतः प्रतीकात्मक मानिएको छ, किनभने कांग्रेसका दुवै सदनबाट पारित भए पनि यसले कानुनी रूपमा बाध्यकारी प्रभाव पार्दैन।
सन् १९७३ को ‘वार पावर्स रिजोलुसन’ लागू भएपछि पहिलो पटक कांग्रेसका दुवै सदनले राष्ट्रपतिलाई सैन्य कारबाही अन्त्य गर्न निर्देशन दिने प्रस्ताव पारित गरेका कारण यसलाई महत्वपूर्ण घटनाका रूपमा हेरिएको छ।
विश्लेषकहरूले यस मतदानलाई आगामी मध्यावधि निर्वाचनअघि रिपब्लिकन पार्टीभित्र बढ्दो मतभेदको संकेतका रूपमा व्याख्या गरेका छन्। साथै, इरानसँगको तनाव र युद्धको सम्भावनाप्रति अमेरिकी जनमतमा बढ्दो असन्तुष्टि देखिएको बताइएको छ।
तर ह्वाइट हाउसका एक अधिकारीले युद्धविरामपछि हाल कुनै सक्रिय सैन्य कारबाही नरहेको र अमेरिकी सैनिक फिर्ता बोलाउनुपर्ने अवस्था नभएको बताएका छन्।
