चितवन, असार ९ । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनमा प्रस्तुत दुई प्रतिवेदनमा पार्टी सदस्यता संख्याबारे फरक–फरक तथ्याङ्क सार्वजनिक भएपछि प्रश्न उठेको छ।
महामन्त्री कविन्द्र बुर्लाकोटीले प्रस्तुत गरेको साङ्गठनिक प्रतिवेदनमा पार्टीको कुल सदस्य संख्या ५ लाख २३ हजार ४६५ रहेको उल्लेख छ। प्रतिवेदनअनुसार मधेश प्रदेशमा सबैभन्दा बढी १ लाख २१ हजार ८९९ सदस्य छन् भने बागमती प्रदेश दोस्रो स्थानमा रहेको छ।
तर, केन्द्रीय कोषाध्यक्ष लीमा अधिकारीले प्रस्तुत गरेको आर्थिक प्रतिवेदनमा पार्टीको कुल सदस्य संख्या ३ लाख ९१ हजार ४१८ मात्र देखाइएको छ। यो संख्या महामन्त्रीले प्रस्तुत गरेको तथ्याङ्कभन्दा १ लाख ३२ हजार ४७ ले कम हो।
कोषाध्यक्ष अधिकारीका अनुसार पार्टी स्थापना हुँदा ३७ हजार १६४ सदस्य रहेकामा हाल उक्त संख्या ३ लाख ९१ हजार ४१८ पुगेको छ। आर्थिक प्रतिवेदनमा पार्टीको ५ करोड ६१ लाख रुपैयाँ बचत तथा ८ करोड ७ लाख रुपैयाँ कुल सम्पत्ति रहेको उल्लेख गरिएको छ।
एकै महाधिवेशनमा प्रस्तुत दुई आधिकारिक प्रतिवेदनमा सदस्यता संख्यामा ठूलो अन्तर देखिएपछि पार्टीको तथ्याङ्क व्यवस्थापन र अभिलेखीकरणबारे जिज्ञासा बढेको छ।
