कास्की, असार ९ । पोखरा महानगरपालिकाले पृथ्वीचोकस्थित प्रस्तावित सुविधासम्पन्न बसपार्क निर्माणका लागि क्षेत्रभित्र रहेका सबै व्यापारिक संरचना हटाएको छ।
बसपार्क क्षेत्रभित्र रहेको बास्तोला कम्प्लेक्ससहित उत्तरतर्फको पेट्रोलपम्प लाइनका सटर तथा कबलहरू हटाइएको महानगरले जनाएको छ। विसं २०३० मा बसपार्क निर्माणका लागि अधिग्रहण गरिएको जग्गामा करिब पाँच दशकपछि ‘साइट क्लियर’ गर्ने कार्य सुरु गरिएको हो। संरचना हटाइएका स्थानमा सरसफाइ तथा सम्याउने कामसमेत गरिएको छ।
यद्यपि, बसपार्क निर्माणको मुख्य चुनौतीका रूपमा रहेको सुकुमवासी बस्ती भने अझै हटाइएको छैन । बसपार्क क्षेत्रभित्र रहेका तीन सुकुमवासी बस्तीमा ५७२ परिवार बसोबास गर्दै आएका छन्। महानगरले उनीहरूको वैकल्पिक व्यवस्थापनपछि मात्र बस्ती हटाउने जनाएको छ ।
पोखरा महानगरपालिकाका प्रमुख धनराज आचार्यले सुकुमवासीहरूको व्यवस्थापन नगरी उनीहरूलाई हटाइने अवस्था नरहेको स्पष्ट पार्नुभयो। उहाँका अनुसार बस्तीमा बसोबास गर्नेहरूको विवरण तथा कागजात प्रमाणीकरणको काम भइरहेको छ । केही व्यक्तिले गलत वा अपूर्ण विवरण दिएको भेटिएकाले त्यस्ता व्यक्तिमाथि प्रचलित कानुनअनुसार कारबाही गरिने उहाँले बताउनुभयो ।
महानगरले पटक–पटक सुकुमवासीहरूको उचित व्यवस्थापनपछि मात्र स्थानान्तरण गरिने प्रतिबद्धता जनाएको उल्लेख गर्दै प्रमुख आचार्यले बाहिरी व्यक्तिहरूले गलत सूचना फैलाएर बस्तीवासीलाई भ्रमित पार्ने प्रयास गरिरहेकोप्रति सचेत रहन आग्रह गर्नुभयो।
हाल डोजर लगाएर खाली गरिएको बास्तोला कम्प्लेक्स तथा पेट्रोलपम्प लाइनको जग्गा निजी स्वामित्वमा रहेको बताइएको छ। बसपार्कका लागि अधिग्रहण गरिए पनि पछि पोखरा उपत्यका नगर विकास समितिले उक्त क्षेत्रभित्र सट्टाभर्ना तथा घडेरी वितरण गर्ने निर्णय गरेको थियो।
महानगरपालिकाले जग्गा सट्टाभर्नालगायतका विषयको छानबिन गर्न पूर्वन्यायाधीशको नेतृत्वमा न्यायिक समिति गठन गरेको छ। समितिले भने हालसम्म प्रतिवेदन बुझाउन सकेको छैन ।
उता, बसपार्क क्षेत्रका सुकुमवासीहरू पनि उचित वैकल्पिक व्यवस्था भएमा बस्ती खाली गर्न तयार रहेको बताएका छन्। सुकुमवासी सरोकार समितिका अध्यक्ष प्रेम गुरुङले आफूहरू विकासका विरोधी नभएको उल्लेख गर्दै बसोबासको विकल्प उपलब्ध गराइए तत्काल स्थानान्तरण हुन तयार रहेको बताउनुभयो ।
