कोहलपुर, बाँके । अखिल नेपाल सुकुम्बासी तथा अव्यवस्थित संघ बाँकेको प्रथम जिल्ला भेला शनिबार कोहलपुरस्थित सुनाखरी होटलको सभाहलमा उल्लेखनीय सहभागिताका साथ भव्य रूपमा सम्पन्न भएको छ।

भेलाको सुरुआत ज्ञात–अज्ञात शहीदहरूप्रति एक मिनेट मौनधारण गरी गरिएको थियो। कार्यक्रमको उद्घाटन संघका केन्द्रीय अध्यक्ष तथा प्रमुख अतिथि तुलसीराम सापकोटाले गर्नुभएको थियो।

कार्यक्रममा युवक संघका पूर्व केन्द्रीय अध्यक्ष कृष्णराज पाण्डे, महिला संघकी केन्द्रीय सचिव पूर्णकला भण्डारी, राष्ट्रिय जनमोर्चा बाँकेका उपाध्यक्ष जगदीश ढकाल, किसान संघ बाँकेका जिल्ला अध्यक्ष तिलकराज पौडेल, राष्ट्रिय जनमोर्चा कोहलपुर नगर उपाध्यक्ष बालाराम न्यौपाने, सुकुम्बासी तथा अव्यवस्थित संघका केन्द्रीय सदस्य मानबहादुर सुनार तथा जातीय समता समाजका केन्द्रीय सदस्य मनबहादुर सुनारलगायतले शुभकामना मन्तव्य व्यक्त गर्दै भेलाको सफलताको कामना गर्नुभएको थियो।

भेलामा सहभागीहरूलाई आयोजकका तर्फबाट गोविन्द परियारले स्वागत गर्नुभएको थियो। कार्यक्रमको सञ्चालन लोकबहादुर राना मगरले गर्नुभएको थियो भने अध्यक्षता कले दमाईले गर्नुभएको थियो।

भेलाले मानबहादुर सुनारको अध्यक्षतामा दुई रिक्त सदस्य र दुई सल्लाहकारसहित १३ सदस्यीय जिल्ला कार्यसमिति निर्वाचित गरेको छ। नवगठित कार्यसमितिमा गोविन्द परियार उपाध्यक्ष, गीता कुमारी विक सचिव तथा गगनबहादुर खत्री कोषाध्यक्ष चयन हुनुभएको छ। त्यसैगरी रघुवीर परियार, रामबहादुर गन्धर्व, बालकुमारी सुनार, पार्वती कार्की र कले दमाई सदस्यमा निर्वाचित हुनुभएको छ। समितिमा दुई सदस्य पद रिक्त राखिएको छ। लोकबहादुर राना मगर र तिलकराज पौडेल सल्लाहकार चयन हुनुभएको छ।

भेलापछि बसेको पहिलो बैठकले कार्यक्रम उत्साहजनक तथा सफलतापूर्वक सम्पन्न भएको समीक्षा गरेको छ। बैठकले आगामी दिनमा विभिन्न पालिकाहरूमा सुकुम्बासीहरूको संगठन विस्तार गर्दै समिति गठन गर्ने, सुकुम्बासी तथा अव्यवस्थित बस्तीका नागरिकका समस्याहरूलाई संगठित रूपमा उठान गर्ने, सम्बन्धित पालिकाका प्रमुखहरूलाई ज्ञापनपत्र बुझाउने तथा आन्दोलनलाई प्रभावकारी बनाउन विभिन्न पालिकाहरूमा जिम्मेवारी बाँडफाँट गर्ने निर्णय गरेको जनाएको छ।

बैठकले सुकुम्बासी तथा अव्यवस्थित बस्तीका नागरिकहरूको हक, अधिकार र न्यायोचित मागहरूको सम्बोधनका लागि संयुक्त संघर्षलाई थप सशक्त बनाउने तथा आवश्यक पहल र अभियान सञ्चालन गर्ने निर्णयसमेत गरेको छ।