काठमाडौँ । प्रतिनिधिसभाले सरकारले गत वैशाखमा ल्याएका चार अध्यादेश स्वीकृत गरेको छ। शुक्रबार बसेको प्रतिनिधिसभा बैठकले सार्वजनिक खरिद (दोस्रो संशोधन) अध्यादेश, सम्पत्ति शुद्धीकरण (मनि लाउन्डरिङ) अध्यादेश, सहकारी (पहिलो संशोधन) अध्यादेश तथा स्वास्थ्य विज्ञान प्रतिष्ठानसम्बन्धी केही नेपाल ऐन संशोधन अध्यादेश पारित गरेको हो।

अध्यादेश अस्वीकृत गरियोस् भन्ने प्रस्तावहरू बहुमतले अस्वीकृत भएपछि सम्बन्धित मन्त्रीहरूले जवाफ दिएका थिए। त्यसपछि सभामुख डोलप्रसाद अर्यालले निर्णयार्थ प्रस्तुत गरेका अध्यादेशहरू प्रतिनिधिसभाबाट स्वीकृत भएका हुन्।

सरकारले संसद् अधिवेशन स्थगित रहेका बेला गत वैशाखमा यी अध्यादेश जारी गरेको थियो। वैशाख २८ गते सुरु भएको संसद् अधिवेशनको पहिलो बैठकमा अध्यादेशहरू पेश गरिएको थियो।