काठमाडौं, असार ४ । नागरिक अधिकार र प्रेस स्वतन्त्रतामाथि अंकुश लगाउने सरकारी प्रयासको विरोधमा नेपाल पत्रकार महासंघले शुक्रबार माइतीघर मण्डलमा आन्दोलन गर्ने भएको छ। उक्त आन्दोलनमा सहभागी हुन ‘शान्ति र लोकतन्त्रका लागि पेसागत सञ्जाल’ (पापड) ले आह्वान गरेको छ।
पापडले सरकारका पछिल्ला गतिविधिले न्यायपालिकाको स्वतन्त्रता, संसद्को भूमिका, प्रेस तथा अभिव्यक्ति स्वतन्त्रता, सूचनाको हक र नागरिक अधिकारमा असर पारेको जनाएको छ। लोकतान्त्रिक मूल्य–मान्यता, विधिको शासन, संस्थागत सन्तुलन तथा नागरिक स्वतन्त्रताको रक्षा गर्न सबै लोकतन्त्रवादी शक्ति, सञ्चार क्षेत्र, शैक्षिक समुदाय र नागरिक समाजलाई एकजुट हुन आग्रह गरिएको छ।
पापडमा नेपाल चिकित्सक संघ, नेपाल पत्रकार महासंघ, नेपाल बार एसोसिएसन, नेपाल प्राध्यापक संघ, नेपाल शिक्षक महासंघ र नेपाल इन्जिनियर्स एसोसिएसन आबद्ध छन्।
