प्रेमचन्द्र झा
रौतहट, असार ३ — मधेस मिडिया काउन्सिलद्वारा चन्द्रनिगाहपुरमा आयोजित आचारसंहिता सम्बन्धी अभिमुखीकरण कार्यक्रममा पत्रकारितामा लाइसेन्स प्रणाली लागू गर्ने विषयमा व्यापक बहस भएको छ।
नेपाल पत्रकार महासंघका पूर्व अध्यक्ष धर्मेन्द्र झाले पत्रकारितालाई लाइसेन्ससँग जोड्ने अवधारणाप्रति असहमति जनाउँदै पत्रकारिता लोकतन्त्रको आधारस्तम्भ भएकाले यसलाई प्रशासनिक नियन्त्रणमा राख्न नहुने बताए। उनले पत्रकारिताको गुणस्तर अभिवृद्धिका लागि राज्यले नियन्त्रणभन्दा क्षमता विकासमा जोड दिनुपर्ने धारणा राखे।
कार्यक्रमका प्रमुख अतिथि मधेस प्रदेशका सञ्चारमन्त्री कनिस पटेलले पत्रकारितामा बढ्दो गैरव्यावसायिक प्रवृत्तिप्रति चिन्ता व्यक्त गर्दै डाक्टर र इन्जिनियरजस्तै पत्रकारितामा पनि व्यावसायिक मापदण्ड कायम गर्न लाइसेन्स प्रणालीबारे छलफल हुन सक्ने बताए। उनले पत्रकारले निष्पक्ष, तथ्यपरक र जिम्मेवार सूचना सम्प्रेषण गर्नुपर्नेमा जोड दिए।
कार्यक्रममा सहभागी अन्य वक्ताहरूले पत्रकारिताको विश्वसनीयता कायम राख्न आचारसंहिताको प्रभावकारी कार्यान्वयन, व्यावसायिकता र जनउत्तरदायित्व आवश्यक रहेको बताएका थिए।
मधेस मिडिया काउन्सिलकी अध्यक्ष बन्दना झाको अध्यक्षतामा सम्पन्न कार्यक्रममा पत्रकारिता स्वतन्त्रता, राज्यको भूमिका, व्यावसायिक मर्यादा र लोकतन्त्रमा सञ्चारमाध्यमको महत्वबारे गहन छलफल भएको थियो।
