काठमाडौँ, असार ३ । नेपाली काँग्रेसका सचेतक निश्कल राईले चिया क्षेत्रले अर्थतन्त्रमा महत्त्वपूर्ण योगदान दिँदा पनि सरकारले बेवास्ता गरेको आरोप लगाएका छन् ।
प्रतिनिधिसभाको आकस्मिक समयमा बोल्दै उनले प्रधानमन्त्रीमाथि कटाक्ष गर्दै सामाजिक सञ्जालमा चिया पसलमा समय बिताउने देखिए पनि चिया उद्योग र किसानका समस्याप्रति ध्यान नदिएको टिप्पणी गरे ।
उनका अनुसार भारतले चिया निर्यातमा लागू गरेको नयाँ ‘स्ट्यान्डर्ड अपरेटिङ प्रोसिजर’ (क्इए) का कारण इलामका ८३ चिया उद्योग प्रभावित भएका छन्। परीक्षण रिपोर्ट आउन ढिलाइ हुने र रिपोर्ट नआएसम्म चिया बिक्री गर्न नपाइने व्यवस्था तथा सामान्य त्रुटिमा समेत उत्पादन नष्ट गर्नुपर्ने प्रावधानले उद्योग ठप्प भएको उनले बताए ।
यसले किसानले टिपेको हरियो चियापत्ती खेर जाने, मजदुर बेरोजगार हुने र उद्यमीले बैंक ऋण तिर्न नसक्ने अवस्था सिर्जना भएको उनको भनाइ छ ।
समस्याको समाधानका लागि उनले भारतसँग कूटनीतिक पहल गरी निर्यात खुलाउन, नेपालमै चिया परीक्षण प्रयोगशाला स्थापना गर्न र तेस्रो देशमा बजार विस्तार गर्न सरकारसँग माग गरे ।
