मेटा कम्पनीले फेसबुक प्रयोगकर्ताका लागि कृत्रिम बुद्धिमत्ता (एआई) मा आधारित नयाँ सुविधाहरू सार्वजनिक गरेको छ। यसअन्तर्गत फेसबुकको खोज प्रणालीलाई अझ उन्नत बनाउन ‘एआई मोड’ फिचर तथा तस्बिर र भिडियो सम्पादनका लागि नयाँ एआई उपकरणहरू थपिएका छन्।
नयाँ सर्च प्रणालीमा समावेश गरिएको ‘एआई मोड’ ले मेटा एआईको प्रयोग गरी प्रयोगकर्तालाई वेब लिङ्कहरूको सूची देखाउनुको सट्टा सिधै विस्तृत र सान्दर्भिक उत्तर उपलब्ध गराउनेछ। यो प्रणालीले फेसबुकका सार्वजनिक ग्रुप र रिल्समा प्रयोगकर्ताहरूले गरेका वास्तविक छलफल, अनुभव र प्रतिक्रियाहरूको विश्लेषण गरी उत्तर तयार पार्ने बताइएको छ।
मेटाले यसअघि फेसबुक ग्रुपका कमेन्टहरूबाट उपयोगी जानकारी खोज्न सहज बनाउने उद्देश्यले ‘फोरम’ नामक छुट्टै एपसमेत सार्वजनिक गरिसकेको छ। नयाँ अपडेटमार्फत कम्पनीले रेडिटजस्तै प्रयोगकर्ताद्वारा सिर्जित ज्ञान र अनुभवको भण्डारलाई आफ्नै प्लेटफर्मभित्र प्रभावकारी रूपमा उपयोग गर्न खोजेको देखिन्छ।
यसका साथै फेसबुकमा तस्बिर तथा भिडियो सम्पादनका लागि पनि एआई क्षमताहरू थपिएका छन्। नयाँ सुविधाअन्तर्गत मोबाइलको क्यामेरा रोलमा रहेका पुराना तस्बिरहरू स्क्यान गरी स्वचालित रूपमा भिडियो कोलाज, ट्रान्जिसन इफेक्ट तथा अन्य आकर्षक पोस्टहरू तयार गर्न सकिनेछ।
प्रयोगकर्ताले विगत एक महिनामा गरेका गतिविधिहरूलाई एआईले स्वतः सङ्कलन गरी पोस्टका लागि सुझाव दिने सुविधा पनि उपलब्ध गराइएको छ। कम्पनीका अनुसार यो सुविधा पूर्ण रूपमा ऐच्छिक (अप्ट–इन) हुनेछ र प्रयोगकर्ताको सहमतिपछि मात्र सक्रिय हुनेछ।
फेसबुक स्टोरी र प्रोफाइलका लागि नयाँ फोटो प्रिसेटहरू पनि उपलब्ध गराइएको छ। यस सुविधामार्फत एआईको प्रयोग गरेर तस्बिरमा देखिएका लुगा परिवर्तन गर्न सकिनेछ। उदाहरणका लागि, खेलकुदका समर्थकहरूले ‘एडिट विथ एआई’ विकल्प प्रयोग गरी ‘वेयर इट’ वा ‘वार्डरोब’ फिचरमार्फत आफ्नो तस्बिरमा भर्चुअल रूपमा मनपर्ने टोलीको जर्सी लगाउन सक्नेछन्।
मेटाले यी नयाँ एआई सुविधाहरूले फेसबुक प्रयोगकर्ताको अनुभवलाई थप व्यक्तिगत, अन्तरक्रियात्मक र सिर्जनात्मक बनाउने विश्वास व्यक्त गरेको छ।
