काठमाडौं, २ असार । चीन भ्रमणमा रहेका नेपालका परराष्ट्रमन्त्री शिशिर खनाल र चिनियाँ विदेशमन्त्री वाङ यी बीच सोमबार बेइजिङमा भेटवार्ता भएको छ।
भेटमा वाङ यीले ‘टाढाको आफन्तभन्दा नजिकको छिमेकी राम्रो’ भन्ने उक्ति उद्धृत गर्दै चीन नेपालका लागि विकास, समृद्धि र आधुनिकीकरणको यात्रामा सधैं भरपर्दो छिमेकी र साझेदार रहने बताएका छन्। उनले चीन–नेपाल सम्बन्धलाई आफ्नो छिमेकी कूटनीतिको महत्वपूर्ण स्थानमा राखिएको उल्लेख गर्दै नेपालको सार्वभौमिकता, स्वतन्त्रता र भौगोलिक अखण्डताप्रति चीनको समर्थन निरन्तर रहने बताए।
वाङले नेपालले ‘एक चीन नीति’ प्रति देखाएको प्रतिबद्धताको प्रशंसा गर्दै उच्च गुणस्तरको बीआरआई सहकार्यअन्तर्गत विद्युत् प्रसारण, सडक, नाका तथा हवाई यातायातलगायत क्षेत्रमा सहयोग विस्तार गर्ने प्रतिबद्धता व्यक्त गरे। साथै, चिनियाँ कम्पनीहरूलाई नेपालमा लगानी गर्न प्रोत्साहन गरिने र नेपालमा पारदर्शी तथा अनुकूल व्यावसायिक वातावरणको अपेक्षा गरिएको बताए।
दुवै पक्षले बहुपक्षीय मञ्चहरूमा सहकार्य सुदृढ गर्दै विकासशील राष्ट्रहरूको साझा हित संरक्षणमा मिलेर काम गर्ने विषयमा पनि जोड दिएका छन्।
