काठमाडौँ। काठमाडौँको कीर्तिपुरस्थित होल्डिङ सेन्टरमा बसोबास गर्दै आएका सुकुमबासी बस्तीका नागरिकहरूले खाद्यान्नको व्यवस्था नभएको भन्दै आन्दोलन सुरु गरेका छन्।

लामो समयदेखि आधारभूत आवश्यकताबाट वञ्चित हुँदै आएको उनीहरूको गुनासो छ। राज्यले आफूहरूको न्यूनतम जीवनयापनको अधिकार सुनिश्चित गर्न नसकेको तथा खानाको व्यवस्था नगरेको भन्दै उनीहरू विरोधमा उत्रिएका हुन्।

होल्डिङ सेन्टरमा आश्रय लिएर बसेका परिवारहरूमा खाद्यान्न अभाव चुलिँदै गएपछि दैनिक जीवन कष्टकर बन्दै गएको छ। छाक टार्नसमेत कठिनाइ भएपछि उनीहरू आफ्ना मागसहित आन्दोलनमा सहभागी भएका छन्।

खाद्यान्न अभावका कारण त्यहाँ बसोबास गर्ने बालबालिकाको शिक्षामा समेत प्रतिकूल असर परेको स्थानीयवासीको भनाइ छ। पर्याप्त भोजनको व्यवस्था नहुँदा विद्यालय जाने उमेरका बालबालिका नियमित रूपमा विद्यालय जान नसकेको उनीहरूले बताएका छन्।

सुकुमबासी बस्तीका नागरिकहरूले सम्बन्धित निकायले आफ्ना समस्याप्रति बेवास्ता गरेको आरोप लगाएका छन्। होल्डिङ सेन्टरमा उचित व्यवस्थापन, खाद्यान्न तथा राहत सामग्रीको व्यवस्था नहुँदा साना बालबालिका, वृद्धवृद्धा, गर्भवती तथा सुत्केरी महिलाहरू सबैभन्दा बढी प्रभावित भएका छन्।

आन्दोलनरत नागरिकहरूले तत्काल खाद्यान्न, स्वास्थ्य सेवा तथा आधारभूत आवश्यकताको व्यवस्था गर्न सरकारसँग माग गरेका छन्। उनीहरूले आफ्ना मागको सम्बोधन नभए आन्दोलनलाई थप सशक्त बनाउने चेतावनीसमेत दिएका छन्।