सिद्धार्थनगर (भैरहवा), असार १ । रुपन्देहीमा क्रिकेट खेलप्रतिको बढ्दो लोकप्रियता र पूर्वाधार विस्तारसँगै निजी क्षेत्रको सक्रियताले नयाँ आयाम थपेको छ। निजी लगानीमा अन्तरराष्ट्रियस्तरको क्रिकेट मैदान निर्माण सम्पन्न हुने चरणमा पुगेको बेला सरकारी स्वामित्वको सिद्धार्थ क्रिकेट रङ्गशाला भने बजेट अभाव र सुस्त कार्यान्वयनका कारण अझै पूर्ण हुन सकेको छैन।

तिलोत्तमा नगरपालिका–१७, पूर्वदरखसवामा अष्ट्रेलियामा व्यवसाय गर्दै आएका विनोद कुँवरको लगानीमा करिब ६० करोड रुपैयाँको लागतमा ‘एक्स्ट्राटेक ओभल’ क्रिकेट मैदान निर्माण गरिएको हो। छ बिघा क्षेत्रफलमा फैलिएको उक्त रङ्गशालामा खेलाडीका ड्रेसिङ रुम, मिडिया बक्स, भिआइपी बक्सलगायतका संरचना निर्माण भइरहेका छन्।

नेपाली राष्ट्रिय क्रिकेट टोलीका पूर्वकप्तान तथा रङ्गशालाका ब्रान्ड एम्बेसडर शक्ति गौचनका अनुसार मैदान राष्ट्रियस्तरका प्रतियोगिता सञ्चालन गर्न तयार भइसकेको छ भने अन्य पूर्वाधार विस्तारको काम पनि निरन्तर जारी छ। हाल दुईदेखि तीन हजार दर्शक अट्ने क्षमता रहेको रङ्गशालालाई आगामी दिनमा १५ हजारदेखि २० हजार दर्शक क्षमतासम्म विस्तार गर्ने योजना रहेको छ।

रङ्गशालासँगै आवासीय सुविधासहितको क्रिकेट एकेडेमी सञ्चालन गरी दक्ष खेलाडी उत्पादन गर्ने लक्ष्य राखिएको छ। यसले खेलकुद विकाससँगै पर्यटन तथा स्थानीय अर्थतन्त्रलाई समेत टेवा पुग्ने अपेक्षा गरिएको छ।

लगानीकर्ता पक्षले मैदानसम्म पुग्ने सडक, विद्युत् तथा अन्य आधारभूत पूर्वाधार निर्माणमा सरकारको सहयोग आवश्यक रहेको बताएका छन्। उनीहरूले रङ्गशाला निर्माणका लागि प्रत्यक्ष सरकारी आर्थिक सहयोग आवश्यक नभए पनि पहुँचमार्ग तथा सार्वजनिक पूर्वाधार विकासमा राज्यको भूमिका महत्वपूर्ण रहने धारणा व्यक्त गरेका छन्।

यता, भैरहवास्थित सिद्धार्थ क्रिकेट रङ्गशालालाई अन्तरराष्ट्रियस्तरमा स्तरोन्नति गर्ने योजना भने लामो समयदेखि अलपत्र अवस्थामा छ। वि.सं. २०६८ मा सुरु गरिएको उक्त परियोजनाको हालसम्म करिब १६ प्रतिशत मात्र काम सम्पन्न भएको जनाइएको छ।

रुपन्देही क्रिकेट सङ्घका अध्यक्ष हरिबहादुर थापाका अनुसार पर्याप्त बजेट विनियोजन नहुनु तथा बहुवर्षीय योजनाअन्तर्गत प्रभावकारी रूपमा कार्यान्वयन हुन नसक्नु परियोजना सुस्त हुनुका प्रमुख कारण हुन्। हालसम्म करिब १२ करोड रुपैयाँ खर्च भए पनि रङ्गशालाका अधिकांश संरचना निर्माण हुन बाँकी छन्।

डीपीआरअनुसार प्रारम्भिक लागत ३८ करोड रुपैयाँ अनुमान गरिएको भए पनि समयसँगै निर्माण लागत बढ्दै गएकाले रङ्गशाला सम्पन्न गर्न अहिले ७० करोड रुपैयाँभन्दा बढी आवश्यक पर्ने अनुमान गरिएको छ।

खेलकुद क्षेत्रका सरोकारवालाले क्रिकेटप्रति बढ्दो आकर्षणलाई मध्यनजर गर्दै सरकारी रङ्गशाला निर्माणलाई उच्च प्राथमिकतामा राख्नुपर्ने बताएका छन्। उनीहरूका अनुसार निजी क्षेत्रले देखाएको उत्साह र लगानीले रुपन्देहीलाई क्रिकेटको महत्वपूर्ण केन्द्रका रूपमा स्थापित गर्न मद्दत पुर्‍याएको छ। अब सरकारी परियोजनाहरू पनि सोही गतिमा अघि बढ्न सके क्रिकेट पूर्वाधार विकासले थप गति लिने विश्वास व्यक्त गरिएको छ।