काठमाडौं । काभ्रेपलाञ्चोकको नमोबुद्ध नगरपालिका–४ का स्थानीयवासीले सार्वजनिक गौचरन तथा वन क्षेत्रको जग्गा निजी नाममा दर्ता गरी बिक्री गरिएको भन्दै त्यसको संरक्षणका लागि सम्बन्धित निकाय र प्रधानमन्त्रीसमक्ष गुहार गरेका छन्।
स्थानीयका अनुसार साविक मेथिनकोट गाविस–२ (हाल नमोबुद्ध नगरपालिका–४) स्थित कित्ता नम्बर ३०४ को ११–११–२–० क्षेत्रफलको जग्गा परापूर्वकालदेखि गौचरन तथा २०३३ सालको नापीमा वन क्षेत्रका रूपमा कायम रहेको थियो। उक्त जग्गा निजी नाममा दर्ता गरी बिक्री–वितरण गरिएको र यसबाट करोडौं रुपैयाँको कारोबार भएको आरोप स्थानीयले लगाएका छन्।
यस सम्बन्धमा स्थानीयवासीले २०८२ साल मंसिरमा अख्तियार दुरुपयोग अनुसन्धान आयोग, गृह मन्त्रालय, वन मन्त्रालय, जिल्ला प्रशासन कार्यालय काभ्रेपलाञ्चोकलगायत विभिन्न निकायमा उजुरी दिएका थिए। उजुरीमा केही व्यक्तिहरू तथा सम्बन्धित सरकारी निकायका कर्मचारीहरूको संलग्नतामा सार्वजनिक जग्गा निजीकरण गरिएको दाबी गरिएको छ।
स्थानीयहरूले उजुरी परेपछि विवादित जग्गामा खेती लगाई भोगचलन देखाउने प्रयास गरिएको आरोपसमेत लगाएका छन्। उनीहरूले सार्वजनिक जग्गाको संरक्षण, विवादित दर्ता तथा कारोबारको छानबिन, र दोषीमाथि कानुनी कारबाहीको माग गरेका छन्।
यद्यपि हालसम्म उक्त जग्गाको विषयमा स्पष्ट निर्णय नभएको भन्दै स्थानीयवासीले पुनः सम्बन्धित निकाय र प्रधानमन्त्रीसमक्ष निष्पक्ष छानबिन तथा सार्वजनिक सम्पत्तिको संरक्षणका लागि पहल गरिदिन आग्रह गरेका छन्।
स्थानीयहरूको भनाइअनुसार विवादित जग्गा गौचरन र वन क्षेत्र रहेको प्रमाणसमेत सम्बन्धित निकायमा पेश गरिएको छ।
