काठमाडौं । नेपाल रेडक्रस सोसाइटीमा नवनियुक्त पदाधिकारीहरुले पदभार ग्रहण गरेका छन् । अनियमितता गरेको आरोपमा पुरानो समिति अपदस्थ भएपछि नयाँ तदर्थ समिति गठन भएको हो ।
नवगठित तदर्थ समितिले एक हप्ताभित्र स्वेतपत्र जारी गर्ने भएको छ । आइतबार पदभार ग्रहण गर्दै अध्यक्ष डा. नेत्र तिम्सिनाले जनता, सरकार र साझेदारहरूलाई रेडक्रसको अहिलेको स्थितिको बारेमा स्पष्ट जानकारी गराउन आगामी हप्ता श्वेतपत्र जारी गर्ने बताउनुभयो ।
आगामी सातासम्ममा नयाँ समितिले आफ्नो विस्तृत कार्ययोजना बनाउने बताउँदै अध्यक्ष डा. तिम्सिनाले भन्नुभयो, ‘नेपाल रेडक्रसको लागि नयाँ ऐन ल्याउन हाम्रो प्रयास हुनेछ र देशको संरचनाअनुसार रेडक्रसको संरचना मिलाउनेतर्फ पनि क्रियाशिल हुनेछौं । आचारसंहिता उल्लंघनमा सुन्य शहनशीलता हुनेछ र संस्थालाई सुद्धिकरण गरिने छ ।’
तदर्थ समितिका महामन्त्री पिताम्बर अर्यालले नेपाल रेडक्रसलाई थप उचाईमा लैजाने, निर्वाचन जतिसक्दो छिटो गर्ने र कानुनी अवस्था सुधार गर्ने नै समितिको प्राथमिकता रहेको बताउनुभयो । पदभार ग्रहण कार्यक्रममा उपाध्यक्षद्धय डा. विश्वकेशर मास्के, शर्मिला कार्की र उपकोषाध्यक्ष होमप्रसाद पाठकको पनि उपस्थिति रहेको थियो ।
साउन १२ गते बसेको मन्त्रिपरिषद् बैठकले नेपाल रेडक्रस सोसाइटीको तत्कालीन कार्यसमिति विघटन गरी संस्थाको साधारण सदस्य मध्येबाट डा. नेत्र तिम्सिनाको अध्यक्षतामा ३३ सदस्यीय तदर्थ समिति गठन गर्ने निर्णय गरेको थियो ।
लामो समयदेखि उनै पदाधिकारी रहँदै आएको रेडक्रसमा व्यापक अनियमितता भएको समाचारहरु बाहिरिएपछि सरकारले समिति विघटन गरी तदर्थ समिति गठन गरेको हो ।
