बाग्लुङ । बागलुङमा आयोजित एक कार्यक्रमका बक्ताहरूले राष्ट्र र जनताको हितमा रहेर संविधान संशोधन गर्न आवश्यक रहेको औलाएका छन् ।
जनताको बलिदानीपूर्ण संघर्षबाट स्थापना भएका उपलव्धीलाई संस्थागत गर्दै अगाडि बढ्नका लागि बर्तमान संविधानमा थप गर्नुपर्ने बिषयलाई समावेश गर्न सकिनेमा उनिहरूले जोड दिएका थिए ।
बर्तमान सरकारले संविधान संशोधन गर्नका लागि प्रक्रिया अगाडि बढाएको सन्दर्भमा राष्ट्रिय जनमोर्चा बागलुङले आयोजना गरेको बर्तमान राजनैतिक अवस्था र संविधान संशोधन बिषयक अन्तरक्रियामा बोल्ने बक्ताहरूले जनताको बलिदानीपूर्ण संघर्षबाट स्थापना भएका गणतन्त्र, सार्वभौमता, अखण्डता, धर्मनिरपेक्ष जस्ता बिषयलाई संस्थागत गर्न आवश्यक रहेको बताएका थिए ।
कार्यक्रममा अवधारणापत्र प्रस्तुत गर्दै जनमोर्चाका केन्द्रिय पूर्व सचिव कृष्ण अधिकारीले संविधान मुलुकको मुख्य कानुनी दस्तावेज भएकाले राजनीतिमा आउने परिर्वतन अनुरुप परिमार्जन गर्दै लैजानुपर्ने बताउनुभयो । उहाँले संविधानमा भएको संङ्घीयता सहितका गलत प्रावधानको संशोधनमा जनमोर्चाले जोड दिदै आएको बताउनुभयो ।
संविधान संशोधन कार्यलाई बिदेशी हस्पक्षेपबाट मुक्त राखिनुपर्नेमा जोड दिदै उहाँले यसका लागि गणतन्त्रवादी तथा देशभक्त शक्तिबिचको एकताले बिशेष महत्व राख्ने बताउनुभयो । बिदेशीका अवाञ्छित स्वार्थलाई अस्वीकार गर्न र मुलुकको राष्ट्रियताका पक्षमा उभिनका लागि आवश्यक रहेकोमा उहाँको जोड थियो ।
बर्तमान सरकारले संविधान सशोधन बहसपत्र निर्माण कार्यदलको संयोजकमा राजा आउ देश बचाउ अभियानमा संलग्नलाई राखिएकोमा शंका उत्पन्न भएकाले आम देशभक्तहरू एक जुट हुन आवश्यक रहेको बताउनुभयो ।
कार्यक्रममा नेकपा एमालेका जिल्ला सचिव गणेश थापा मगर, नेकपाका केन्द्रिय सदस्य राजिव घिमिरे, नेपाल कम्युनिष्ठ पार्टी माओवादीका केन्द्रिय सदस्य टेकबहादुर केसी आजाद, उच्च अदालत बारका अध्यक्ष गीता श्रीस, प्राध्यापक संघ धौलागिरि बहुमुखी क्याम्पसका सभापति भक्तिराम न्यौपाने र पत्रकार महासंघ बागलुङका अध्यक्ष राम थापाले आफ्नो धारणा राख्नु भएको थियो ।
बरिष्ठ अधिवक्ता काजी गाउँले श्रेष्ठले टिप्पणी गर्नु भएको कार्यक्रम जनमोर्चाका जिल्ला अध्यक्ष तिलक थापाको अध्यक्षता, सदस्य लक्ष्मी बाँस्कोटाको स्वागत र सचिव भिमलाल पोखरेलको संचालनमा सम्पन्न भएको थियो ।
