दाङ । जिल्लाको विकास निर्माणमा हुने अनियमितता विरुद्ध राष्ट्रिय जनमोर्चा दाङ आन्दोलनको तयारीमा छ । कोरोना भाइरसका कारण तत्कालै आन्दोलनमा जान सम्भव नभएको भन्दै राजमो दाङले सहज परिस्थितिसँगै आन्दोलनमा जाने गरी तयारी गरेको हो ।
राजमो दाङका अध्यक्ष गणेश आचार्यको हस्ताक्षरमा २०७७ साउन १६ गते सार्वजनिक गरिएको प्रेसविज्ञप्तीमा सो जानकारी दिइएको छ । सोही दिन राजमोका केन्द्रीय कार्यकारी अध्यक्ष रश्मिराज नेपालीको प्रमुख आतिथ्यतामा बसेको बैठकले सो निर्णय गरेको विज्ञप्तीमा उल्लेख गरिएको छ ।
कोरोना भाइरसको महामारी, जिल्लाव्यापी सङ्गठनात्मक अभियान, प्राकृतिक श्रोतसाधनको उपयोगप्रतिको दुरूपयोग, बाढीपहिरो, किसानका समस्यालगायतका विषयमा प्रकाश पारिएको विज्ञप्तीको पूर्ण पाठ यस्तो छ :
“१. कोरोना भाइरसको सङ्क्रमण नरोकिएको र यसको जोखिम झनै बढ्ने सम्भावना विद्यमान रहेकाले यसबाट जोगिनका लागि गरिने पूर्व सावधानीमा ख्याल नगरेको देखिएको छ । सार्वजनिक यातायात र सरकारी कार्यालयमा भिडभाड बढेको छ । यसलाई नियन्त्रण गर्न अनुरोध गर्ने निर्णय भएको छ । यसका साथै जिल्लामा उपचारको समस्या देखिएको हँुदा सरुवारोग अस्पतालको व्यवस्था गर्न सरकारसित माग गर्ने निर्णय भएको छ ।
२. गत फागुन महिनाभरि जिल्लाव्यापी सङ्गठनात्मक अभियान चलेको र त्यस अभियानमा हजारौँको सङ्ख्यामा नयाँ सदस्य थपिएको हँुदा भाद्र मसान्तसम्म ती सबै सदस्यलाई सङ्गठित गर्ने निर्णय भएको छ ।
३. जिल्लाका विकास योजनामा चरम लापरबाही भएको, समयसीमाभित्र योजना सम्पन्न नभएको, अनुदान काम गर्नेलाई होइन, कागज मिलाउनेलाई हुने गरेको, आफ्नोअनुकूलमा भए बजेट हाल्ने, नत्र नहाल्ने भनेर जनप्रतिनिधि प्रस्तुत भएको, योजनामा भ्रष्टाचार हुने गरेको, सेवा–सहयोग, सहुलियत र सुविधा लक्षित वर्गलाई होइन, पहुँचमा हुनेका नजिककालाई हुने गरेकोलगायतका धेरै जनगुनासो आउने गरेका छ्न । यस कुराप्रति हाम्रो पार्टीको गम्भीर ध्यानाकर्षण भएको छ । त्यसैले यसको विरोध गर्ने र अहिले कोरोना भाइरसका कारण असहज भएकाले आगामी दिनमा यसका विरुद्धको कार्यक्रम नै बनाउने निर्णय भएको छ ।
४. प्राकृतिक श्रोतको विषयमा सधैँ किचलो हुने गरेको छ । त्यहाँ हुने अनियमितता, चलखेल र ठुलो भोल्युममा हुने नाफाका कारण अपराधजन्य कामसमेत हुने गरेका छन् । त्यसैले त्यस प्रकारका कार्यको हाम्रो पार्टीले निन्दा गर्दछ । सरकारको मापदण्ड विपरीत हुने सम्पूर्ण उत्खनन् बन्द गर्न जोड दिने निर्णय गरियो ।
५. अहिले बर्खाको समय भएकाले प्राकृतिक प्रकोप बढिरहेका छ्न । डुबान र पहिरो बर्खाका दुबै समस्या हाम्रोमा रहेका छ्न । यसका साथै अन्य रोग र खेतीमा सलहलगायतको प्रकोपको सम्भावना पनि त्यत्ति नै रहेको छ । त्यसैले यस विरुद्धको तयारीका लागि सरकारसित अनुरोध गर्ने निर्णय भएको छ ।
६. अहिले किसानका लागि मलको ठुलो समस्या उत्पन्न भएको छ । आवश्यक समयमा मल भएन भने उत्पादनमा पनि धेरै कमी हुने छ । त्यसैले तत्काल मलको व्यवस्था गर्न सरकारसित अनुरोध गर्ने निर्णय भएको छ ।
७. स्थानीय वडा कार्यालयले टोल विकास संस्था गठन गर्दा सबैलाई जानकारी नगराउने गरेको गुनासो आइरहेको छ । त्यस प्रकारको कार्यशैलीप्रति हाम्रो पार्टीको गम्भीर ध्यानाकर्षण भएको छ । टोल विकास समिति गठन गर्दा सर्वदलीय र सर्वपक्षीय भेला गर्न अनुरोध गर्ने निर्णय भएको छ ।”
