बेइजिङ, जेठ ८ । उत्तरी चिनको शानक्सी प्रान्तस्थित लिउसेनयु कोइलाखानीमा भएको ग्यास विस्फोटले फेरि एकपटक श्रमिक वर्गमाथि पुँजीमुखी उत्पादन प्रणालीको क्रूर यथार्थ उजागर गरेको छ । शुक्रबार साँझ भएको विस्फोटमा कम्तीमा आठ मजदुरको मृत्यु भएको छ भने दर्जनौँ अझै वेपत्ता रहेका छन् ।
विस्फोटको समयमा खानीभित्र काम गरिरहेका सयौँ श्रमिकमध्ये २०१ जनालाई उद्धार गरिएको भए पनि ३८ जना अझै सम्पर्कविहीन रहेको चिनियाँ सञ्चारमाध्यमहरूले जनाएका छन् । प्रारम्भिक विवरणअनुसार खानीभित्र कार्बन मोनोअक्साइडको मात्रा अत्यधिक बढेपछि दुर्घटना भएको हो ।
घटनापछि राष्ट्रपति सि जिङ्पीङले घाइतेहरूको उपचार र घटनाको अनुसन्धान गर्न निर्देशन दिएका छन् । तर श्रमिक अधिकारकर्मीहरूले भने उत्पादन र नाफालाई प्राथमिकता दिने प्रवृत्तिका कारण खानी मजदुरहरू बारम्बार ज्यान गुमाउन बाध्य भइरहेको बताएका छन् ।
चिनमा पछिल्ला वर्षहरूमा खानी सुरक्षामा सुधारका दाबी गरिए पनि श्रमिक सुरक्षाका आधारभूत मापदण्ड पूर्ण रूपमा कार्यान्वयन हुन नसक्दा यस्ता दुर्घटना दोहोरिने गरेका छन् । कठिन र जोखिमपूर्ण परिस्थितिमा श्रम बेच्न बाध्य मजदुर वर्ग नै उत्पादन प्रणालीको सबैभन्दा ठूलो पीडित बनेको विश्लेषकहरूको भनाइ छ ।
श्रमिक संगठनहरूले मृतक मजदुरप्रति श्रद्धाञ्जली व्यक्त गर्दै वेपत्ता श्रमिकहरूको सुरक्षित उद्धार, पीडित परिवारलाई क्षतिपूर्ति तथा खानी क्षेत्रमा कडा सुरक्षा मापदण्ड लागू गर्न माग गरेका छन् ।
