धनबहादुर मगर/कमल राना, काठमाडौँ ।
नेपाल मगर सङ्घको तेह्रौँ राष्ट्रिय महाधिवेशन आगामी जेठ ८ देखि १० सम्म हुने भएको छ ।
मगर सङ्घ केन्द्रीय समितिको तेह्रौँ राष्ट्रिय महाधिवेशन आयोजक समितिले २०८३ जेठ ६ गते पत्रकार सम्मेलन गर्दै सो जानकारी दिएको हो ।
काठमाडौँमा हुन गइरहेको उक्त महाधिवेशनमा भावी कार्यदिशा निर्धारण, नयाँ नेतृत्व चयन, सङ्गठनात्मक पुनर्संरचना, सामाजिक, राजनीतिक तथा सांस्कृतिक विषयमा नीतिगत छलफल तथा दीर्घकालीन रणनीतिक निर्माण गर्ने अपेक्षा सङ्घले गरेको बताइएको छ ।
सङ्घले “ऐतिहासिक मगरात सभ्यता र प्राचीन संस्कार–संस्कृतिको जगमा मगरात दर्शन निर्माण गरौँ, समृद्ध मगर समाज निर्माणको पक्षमा तेह्रौँ राष्ट्रिय महाधिवेशन भव्यताका साथ सफलता पारौँ” भन्ने मूल नाराका साथ महाधिवशन जानकारी दिएको छ ।
महाधिवेशनमा देशरभरबाट ६८ जिल्ला, सात प्रदेश समिति, नौ भ्रातृ संस्था तथा १३ ओटा प्रवास शाखाबाट करिब सात सय प्रतिनिधिको सहभागिता रहनेछ ।
पत्रकार सम्मेलनमा जनाइएअनुसार उद्घाटन समारोह सङ्घका सल्लाहकार तथा पूर्व अर्थमन्त्री वर्षमान पुनमगरको प्रमुख आतिथ्यमा हुनेछ ।
महाधिवेशनमा मगर समुदायको मौलिक भेषभूषा, संस्कृति तथा पहिचान झल्काउने झाँकीसहितको सांस्कृतिक र्याली भृकुटी मण्डपबाट बिहान ११ बजे सुरु भई पुतलीसडक, कमलादी हुँदै नेपाल प्रज्ञा–प्रतिष्ठानको सभाहलमा पुगेर औपचारिक सभामा परिणत हुनेछ ।
बन्दसत्र ९ र १० गते दुईदिन नेपाल पोलिस क्लब भृकुटी मण्डपमा बिहान ७ बजेदेखि १० बजेसम्म हुने राष्ट्रिय महाधिवेशन मूल आयोजक समितिका सदस्य सचिव तथा नेपाल मगर सङ्घका महासचिव टेकबहादुर नाम्जाली मगरद्वारा पे्रसित विज्ञाप्तिमा जनाएको छ ।
सङ्घका अध्यक्ष ज्ञानेन्द्र पुनमगरले पत्रकार सम्मेलनमा नयाँ नेतृत्व चयन सकेसम्म सर्वसम्मतिमा गरिने बताए ।
उनले लखन थापा सांस्कृतिक सङ्ग्रहालयको स्थापना, समृद्ध मगर समाज निर्माणको पक्षमा दस्तावेजीकरण, त्रिभुवन विश्वविद्यालयमा नेपाल मगर अध्ययन, काठमाडौँ विश्वविद्यालमा नेपाल मगर अध्ययन विषयक पठनपाठनसमेत समावेश गर्न सफल भएको जानकारी दिए ।
मगर भाषामा बनेको बोटविरुवाको नाम र स्थानको अभिलेखन गर्ने तथा संविधान संशोधन गर्न नेपाल मगर प्रज्ञा परिषद्लाई जिम्मेवारीसमेत दिएको सम्मेलनमा जानकारी दिइएको थियो ।
