गोविन्दकुमार शर्मा, चौतारा (सिन्धुपाल्चोक) ।
नेपाल पत्रकार महासङ्घ जिल्ला शाखा सिन्धुपाल्चोक र काठमाडौँ शाखामाझ संस्थागत सहकार्य, प्रेस स्वतन्त्रता तथा पत्रकारिताका समसामयिक विषयमा छलफल भएको छ ।
काठमाडौँ शाखाको साधारणसभाको तयारी बैठकका लागि २०८३ जेठ १ गते सिन्धुपाल्चोक पुगेको कार्यसमितिलाई सिन्धुपाल्चोक शाखाले स्वागत गर्दै दुवै शाखाका पदाधिकारी तथा सदस्यमाझ छलफल आयोजना गरिएको हो ।
कार्यक्रममा पत्रकारिताको वर्तमान अवस्था, सञ्चारकर्मीले भोगिरहेका समस्या, प्रेस तथा अभिव्यक्ति स्वतन्त्रताको संरक्षण तथा शाखामाझ सहकार्य विस्तारका विषयमा विचार आदानप्रदान गरिएको थियो ।
सिन्धुपाल्चोक शाखाका अध्यक्ष ध्रुव दङ्गालले शाखाको स्थापना यता भएका गतिविधिबारे जानकारी गराउँदै जिल्लास्तरमा पत्रकारिता सुदृढीकरणका लागि सहकार्य आवश्यक रहेको बताए ।
काठमाडौँ शाखाकी अध्यक्ष शोभा अर्यालले पत्रकारिताको विकास र प्रेस स्वतन्त्रताको पक्षमा जिल्ला शाखाले प्रभावकारी भूमिका खेल्नुपर्ने बताइन् ।
छलफलमा सहभागीले पत्रकार महासङ्घका शाखाबिच अनुभव आदानप्रदान, समन्वय तथा साझा कार्यक्रम सञ्चालनलाई थप प्रभावकारी बनाउने विषयमा जोड दिएका थिए ।
यसैबिच, काठमाडौँ शाखाका सदस्यले चौतारा साँगाचोकगढी नगरपालिकाका मेयरसँग पनि भेटघाट तथा छलफल गरेका थिए । भेटमा मेयरले नगरपालिकाले सामना गरिरहेका चुनौती, विकास निर्माणका प्राथमिकता तथा आगामी कार्यक्रमबारे जानकारी गराएका थिए ।
काठमाडौँ शाखाको टोलीले सिन्धुपाल्चोक चौतारामा रहेको बुद्ध पार्क, भीमसेन मन्दिर तथा लभडाँडा क्षेत्रको अवलोकनसमेत गरेका थिएँ ।
