काठमाडौँ । राष्ट्रिय जनमोर्चाका ज्येष्ठ सदस्य पूर्णबहादुर थापाको निधन भएपछि राजमोको झन्डा ओढाइएको छ ।
२०८३ वैशाख २६ गतेका दिन राजमो केन्द्रीय सदस्य तथा कालीगण्डकी ६ नं. वडाअध्यक्ष पूर्णबहादुर थापा र राजमो कालीगण्डकी सदस्य रनबहादुर थापाले मृतको शवमाथि झन्डा ओढाउनुभएको हो ।
कालीगण्डकी नदीको किनार घुमाउनेघाटमा उपस्थित जनमासबिच मृतकको पार्थिव शरीरमाथि झन्डा ओढाएर श्रद्धाञ्जली व्यक्त गरिएको राजमो नेता बलबहादुर थापाले जानकारी दिनुभएको छ ।
यसैबिच राजमो कालीगण्डकीले आफ्नो ज्येष्ठ सदस्य गुमाउनुपर्दा पार्टीसङ्गठनलाई अतुलनीय क्षति पुगेको पनि जनाएको छ साथै यस दुखद घडीमा शोकाकुल परिवारजनप्रति समवेदना पनि प्रकट गरेको छ ।
कालीगण्डकी गाउँपालिका–६ मरिम निवासी पर्शुराम थापाका छोरा पूर्णबहादुरको १९९१ साउन २ गते जन्म भई ९२ वर्षको उमेरमा २०८३ वैशाख २५ गते दुखद निधन भएको बुझिएको छ ।
मृतकको परिवारमा छोरा वलबहादुर थापा र छोरी दुरपति थापालगायत रहेका छन् ।
