काठमाडौँ । चौथो रोलक्रममा रहेका न्यायाधीश डा. मनोज शर्मा सर्वोच्च अदालतका प्रधान न्यायाधीशमा सिफारिस भएका छन् ।
संवैधानिक परिषद्को २०८३ वैशाख २४ गते बिहीबार सम्पन्न बैठकले शर्माको नाम अघि सारेको हो ।
नेपालको न्यायिक इतिहासमा वरिष्ठतम् न्यायाधीशको साटो रोलक्रमको चौथो क्रममा रहेका न्यायाधीश प्रधान न्यायाधीशमा सिफारिस भएको यो पहिलो घटना हो ।
संसदीय सुनुवाइ समितिले नाम अनुमोदन गरेमा उनी तेत्तिसौँ प्रधान न्यायाधीश बन्नेछन् ।
२०७६ वैशाख ६ गते सर्वोच्च अदालतको न्यायाधीशमा नियुक्त शर्मा संसदीय सुनुवाइबाट अनुमोदन भएमा पूरै कार्यकाल अर्थात् छ वर्ष प्रधान न्यायाधीश रहनेछन् ।
कामु प्रधान न्यायाधीश सपना प्रधान मल्लसहित वरिष्ठतम् न्यायाधीश कुमार रेग्मी र हरि फुयाललाई छाडेर चौथो वरियताक्रममा रहेका शर्मालाई संवैधानिक परिषद्ले प्रधान न्यायाधीशमा प्रस्ताव गरेको हो ।
२०२७ असार ४ गते पर्सामा जन्मिएका शर्मा २०९२ असार ३ गते मात्रै ६५ वर्ष पुग्नेछन् । प्रजातन्त्रको पुनस्र्थापनापछि कुनै पनि प्रधान न्यायाधीशले छ वर्षे कार्यकाल पूरा गरेका छैनन् । छ वर्षे कायकाल पूरा गर्दा उनी २०८९ वैशाखसम्म प्रधानन्यायाधीश रहनेछन् ।
नेपाल ल क्याम्पसमा कानुनमा स्नातक र भारतको पुने विश्वविद्यालयमा कानुनमा स्नातकोत्तर गरेका उनले श्रम कानुनसँग सम्बन्धित विषयमा विद्यावारिधि गरेका छन् । उनी पुनरावेदन अदालतको अतिरिक्त न्यायाधीशमा नियुक्त भएर अस्थायी न्यायाधीशको व्यवस्था हटाएपछि अवकाश भएका थिए ।
पछि चोलेन्द्रशम्सेर जबरा प्रधान न्यायाधीश भएका बेलामा उनी सर्वोच्च अदालतको न्यायाधीशमा सिफारिस भई संसदीय सुनुवाइ प्रक्रियाबाट अनुमोदन भएका थिए ।
