काठमाडौँ । जिल्ला प्रशासन कार्यालय काठमाडौँले विशेष सूचना जारी गर्दै शुक्रबार साँझ ७ बजेसम्म सुकुम्बासी बस्ती खाली गराउन भनेको छ तर संयुक्त राष्ट्रिय सुकुम्बासी मोर्चाले भने त्यसको विरोध गरेको छ ।
जिप्रकाका सहायक सिडिओ एवम् प्रवक्ता मुक्तिराम रिजालले २०८३ वैशाख ११ गते जारी गरेको विज्ञप्तिमा नदीकिनारका सार्वजनिक, सरकारी पर्ती जग्गामा बनेका संरचना हटाउन भनिएको हो ।
यता सोही दिन सुकुम्बासी मोर्चाका महासचिव अर्जुन कुँवरले भने विनाविकल्प सुकुम्बासी बस्ती नहटाउन माग गरेका छन् ।
कुँवरले भनेका छन्– ‘भूमिहीनि दलित, भूमिहीन सुकुम्बासी र अव्यवस्थित बसोबासीमाथिको ज्यादती र दमनको निर्णय विकल्प तत्काल बन्द गरी सम्मानपूर्वक भूमि र आवासमा बस्न पाउने हकको सम्मान गर्न/गराउन यस राष्ट्रिय स्वतन्त्र पार्टीलाई निम्न मागसहित ध्यानाकर्षण गर्दछौँ ।”
त्यससँगै उनीहरूले चार बुँदे माग पनि अगाडि सारेका छन् ।
यस्तो छ जिप्रकाको ६ बुँदे सूचना :
“१. यसरी अवैध रूपमा बनाइएका घरटहरा मिति २०८३ वैशाख ११ गते साँझ ७ बजे भित्रमा खाली गर्नुहोला। आफैले सार्न नसक्ने अवस्थामा महानगरीय प्रहरी, नेपाल प्रहरी र सशस्त्र प्रहरीलाई खबर गर्नुहोला । सुरक्षाकर्मीले आवश्यक ढुवानीको प्रबन्ध मिलाउनेछ ।
२. यस्ता घरटहरामा भएका आफ्ना निजी सरसामान, लत्ताकपडा, घरपालुवा पशुपन्छी सुरक्षित स्थानमा तत्काल सार्ने व्यवस्था गर्नुहोला ।
३. घरटहरामा बसोबास गर्ने अपाङ्ग, साना बालबालिका, गर्भवती, सुत्केरी, वृद्धवृद्धा एवम् बिरामी व्यक्तिलाई प्राथमिकता दिई अन्यत्र सार्ने काम गर्नुहोला । यस कार्यका लागि काठमाडौँ महानगरीय प्रहरी, नेपाल प्रहरी र सशस्त्र प्रहरी बलको समेत मदत लिनुहोला ।
४. मिति २०८३ वैशाख १२ गते बिहान ६ बजेदेखि घरटहरा भत्काउने र अतिक्रमित जग्गा पूर्ण रूपमा खाली गर्ने कार्य हुनेछ । त्यस कार्यमा कोही कसैले बाधाव्यवधान सिर्जना गर्ने कार्य गरेमा कानुनबमोजिम कडा कारबाही भई जानेछ । यस स्थानबाट उठाइएका सबै व्यक्ति तथा परिवारलाई सरकारले तोकेका विभिन्न बसोबासको आधारभूत न्यूनतम सुविधा प्राप्त स्थानमा राखिनेछ ।
५. तपाईंहरूलाई सुरक्षित रूपमा बसोबासको व्यवस्था भएपछि नेपाल सरकारका सम्बन्धित मन्त्रालय तथा अन्य अधिकारप्राप्त निकायबाट वास्तविक भूमिहीन सुकुम्बासीको लगत लिने र स्क्रिनिङको कार्य तत्काल सुरु हुनेछ ।
६. आगामी १० देखि १५ दिनभित्र यकिन भएका वास्तविक भूमिहीनलाई बसोबासको उचित प्रबन्ध गर्ने गरी तयारी भइरहेको छ । यस कार्यका लागि तपाईंहरूले सहयोग गर्नुहोला ।
