काठमाडौँ । भृकुटीमण्डप क्षेत्रमा रहेका भौतिक संरचनाको भाडा नतिर्ने व्यवसायी तथा सङ्घसंस्थालाई बक्यौता बुझाउन अन्तिम पटकका लागि सात दिनको म्याद दिइएको छ ।
समाज कल्याण परिषद्ले २०८२ वैशाख ९ गते सूचना प्रकाशित गर्दै १८ ओटा सङ्घसंस्थालाई बक्यौता चुक्ता गर्न अन्तिम समय दिएको हो ।
भृकुटीमण्डपभित्र रहेका पक्की स्टल, बु र भवन भाडामा लिएर लामो समयदेखि बक्यौता नतिर्नेलाई परिषद्ले यसअघि पटकपटक पत्राचार र सार्वजनिक सूचनामार्फत ताकेता गरेको थियो ।
परिषद्को आग्रहलाई अटेर गरेपछि २०८२ चैत ३० गते ती संरचनामा तालाबन्दी गरिएको थियो । त्यसलगत्तै वैशाख १ गते गोरखापत्र दैनिकमा सातदिने सार्वजनिक सूचना जारी गरिएको र भृकुटीमण्डप क्षेत्रमा समेत सूचना टाँस गरिएको परिषद्ले जनाएको छ ।
परिषद्का अनुसार पहिलोपटक दिइएको सात दिनको म्यादभित्र केही व्यवसायी र संस्थाले आंशिक रकम बुझाए पनि रिपोर्टर्स क्लबसहित अन्य १८ ओटा संस्थाले अझैसम्म बाँकी रकम दाखिला गरेका छैनन् । सोही कारण परिषद्ले पुन: सूचना जारी गर्दै बक्यौता रहेका सम्पूर्ण व्यक्ति तथा संस्थालाई रकम बुझाउन अन्तिमपटक सात दिनको समय दिएको हो ।
थप गरिएको यो अवधिभित्र पनि अटेर गरी बक्यौता चुक्ता नगरेमा प्रचलित कानुनबमोजिम सरकारी बाँकीसरह असुलउपरको प्रक्रिया अगाडि बढाइने र कडा कानुनी कारबाही गरिने चेतावनी समाज कल्याण परिषद्ले दिएको छ ।
