दैलेखबजार । दैलेखको भगवतीमाई गाउँपालिकामा राष्ट्रिय जनमोर्चा गाउँ समितिका सदस्य कर्णबहादुर सिंहमाथि प्रहरीको एक जवानको नेतृत्वमा गुण्डागर्दी गरिएको छ ।
नेपाल प्रहरीका बहालवाला प्रहरी जवान सुरेन्द्र शाहीको नेतृत्वमा तीन जनाले राजमोका सिंहमाथि राती राती घर घेर्ने तथा हातपात गर्नेजस्ता गुण्डागर्दी गरेका हुन् ।
वैशाख २ गते दैलेख जिल्ला भगवतीमाई गाउँपालिका वडा नम्बर ६ सानीगाउँ निवासी राजमो भगवतीमाई गाउँ समितिका सदस्य तथा अनेरास्ववियु (छैठौँ) का दैलेख जिल्ला संयोजक कर्णबहादुर सिंहमाथि उहाँकै घरमा आई गुण्डाद्वारा हमला भएको छ ।
आक्रमणकारीहरू सोही गाउँ बस्ने टोपबहादुर शाहीको छोरा अन्दाजी वर्ष २४ को सुरेन्द्र शाही (बहालवाला प्रहरी), नन्दबहादुर सिंहको छोरा सोही ठाउँ बस्ने अन्दाजी वर्ष २३ को रमेश सिंह र अरू एक जना रहेको खुलेको छ । ती व्यक्तिहरूले खुकुरी र चेन साथमा लिई लागुऔषध सेवन गरी आफ्नै घरमा बसिरहेका कर्णबहादुर र उनको जीवनसँगिनी तारामाथि आक्रमण गरेका थिए ।
कर्णबहादुर सिंहमाथि आक्रमण गरेपछि पनि उनीहरूले ज्यान लिने धम्की दिँदै गएका थिए । त्यसपछि प्रत्येक राति करिब १ बजेतिर मोटरसाइकिलमा आएर घर घेरा हाल्ने र मार्ने धम्कीसमेत दिँदै आएको जानकारी पीडित कर्णबहादुरले दिए ।
आफ्नो हजुरबुबा माथवरसिंहको एक वर्षपहिले रहस्यमय तरिकाले मृत्यु भएकाले आफू र आफ्नो परिवारलाई पनि गुण्डाले मार्ने धम्की दिएकाले देशमा गुण्डाराज चलेको, सर्वसाधारण व्यक्तिले सुरक्षित जीवन जिउन कठिन भएको पीडित कर्णबहादुर सिंह र उहाँको जीवनसङ्गिनी तारा बताइन् ।
नेपाल प्रहरीमा कार्यरत शाही भे११ प६७११ नम्बरको मोटरसाइकल र रमेश सिंहले ११ प१०३१ नम्बरको मोटरसाइकलमा टङ्कबहादुर सिंहलाई साथमा लिएर प्रत्येक दिन रातिको १ बजे कर्णबहादुरको घरमा हमला गर्न आउने गरेको कर्णबहादुर सिंहले बताए ।
प्रहरीको बहालवाला युवकको यस्तो असामाजिक क्रियाकलापप्रति गाउँमा आक्रोश छ ।
नाम प्रकाशन नगर्ने शर्तमा एक युवकले भने– ‘नेपाल प्रहरीमा कार्यरत शाहीलाई त्यसरी गाउँमा गुण्डाको परिचालन गर्न सरोकार संस्थाले पठाएको हो वा उनी भगौडा प्रहरी हो ? सरोकार प्रहरी सङ्गठनले किन छाडा छोडेको छ ? यसरी नेपाल प्रहरीको जवानको नेतृत्वमा गाउँँगाउँमा गुण्डाराज चलाउँदै जाने हो भने ‘नेपाल प्रहरी सङ्गठन जनताको साथी’ भन्ने नाराले के सार्थकता पाउन सक्ला ? सरोकार सङ्गठनले समयमा आफ्नो मातहतका प्रहरी जवानको गतिविधिमा निगरानी राखोस् ।’
