टोकियो । जापान नेपाली एकता समाजको कान्तो क्षेत्रीय समितिले नयाँ वर्ष २०८३ स्वागतार्थ वनभोज कार्यक्रम सम्पन्न गरेको छ ।
केन्द्रीय अध्यक्ष डण्ड केसीको प्रमुख आतिथ्यमा अप्रिल ८, २०२६ का दिन सो कार्यक्रम सम्पन्न भएको हो ।
कार्यक्रमलाई सम्बोधन गर्दै उहाँले नेपालमा वर्तमान सरकारको भूमिका तथा जापानमा नयाँ सरकार गठनसँगै नेपाली समुदायमा देखिएको केही निराशाका विषयमा धारणा राख्नुभयो ।
उहाँले जापानमा बसोबास गर्ने नेपालीले यहाँको कानुनको पूर्ण पालना गर्नुपर्ने र बजारमा फैलिएका हल्लाको पछि नलाग्न आग्रह गर्नुभयो ।
त्यसका साथै उहाँले कामको तनाव र जापानको कडा कानुनी व्यवस्थाका कारण केही नेपालीमा देखिएको मानसिक दबाब (डिप्रेसन) को अवस्थाप्रति चिन्ता व्यक्त गर्दै समयसमयमा साथीभाइबिच भेला भई मनका कुरा साटासाट गर्ने र समस्याको समाधान खोज्ने वातावरण बनाउनुपर्नेमा जोड दिनुभयो ।
उहाँले आउँदै गरेको नयाँ वर्ष २०८३ को अवसरमा सम्पूर्ण नेपालीमा सुख, शान्ति र समृद्धिको कामना पनि व्यक्त गर्नुभयो ।
महासचिव धनराज गौतमले विदेशमा रहे पनि नेपालीहरूले देशको राजनीतिक अवस्थाप्रति चासो राख्नुपर्ने र सरकारलाई सही दिशामा लैजान सचेत भूमिका निर्वाह गर्नुपर्ने आवश्यकता औँल्याउनुभयो ।
त्यस्तै केन्द्रीय सदस्य उमेश निउरेले विदेशमा बसेर रेमिट्यान्समार्फत देशको अर्थतन्त्रमा योगदान पुर्याइरहेका नेपालीलाई मतदानको अधिकार सुनिश्चित गरिनुपर्नेमा जोड दिनुभयो ।
कार्यक्रममा सांस्कृतिक मोर्चाका तर्फबाट नवीन बस्याल र धानु थापा तथा कान्तो क्षेत्रीय समितिका उपाध्यक्ष यामप्रसाद पौडेल अतिथिका रूपमा सहभागी हुनुहुन्थ्यो ।
समितिका अध्यक्ष गोम बुढाथोकीको अध्यक्षता तथा सचिव ऋषिराम पौडेलको सञ्चालनमा सम्पन्न सो कार्यक्रममा रक्तिम सांस्कृतिक अभियानका कलाकारले साङ्गीतिक तथा सांस्कृतिक प्रस्तुति दिएका थिए ।
