सुलीकोट । सुख्खा पहिरो खसेपछि बेनिघाट–आरुघाट–लार्के सडक मङ्गलबार बेलुकादेखि पूर्णरूपमा अवरुद्ध बनेको छ ।

धार्चे गाउँपालिका–३, दोभान नजिकैको कालाभिरमा माथिबाट ठुलो चट्टान खस्दा सडकको आधार नै बगाएको स्थानीयले बताएका छन् ।

उनका अनुसार अब सो स्थानमा ब्लास्टिङ गरेर पुन: नयाँ बेस निर्माण गर्नुपर्ने अवस्था देखिएको छ। सुख्खा पहिरोपछि नेपाली सेनाले सडकको अवस्थाबारे स्थलगत अध्ययन सुरु गरेको छ।

सडक अवरुद्ध भएसँगै सो क्षेत्रमा सवारी साधनको आवागमन पूर्णरूपमा ठप्प भएको छ।दैनिक उपभोग्य सामग्री ढुवानीमा समेत समस्या उत्पन्न भएको स्थानीयवासीले गुनासो गरेका छन्। विशेषगरी मनास्लु क्षेत्रतर्फ जाने पर्यटकहरू प्रभावित भएका छन्।

गाउँपालिकाले यात्रुहरूलाई वैकल्पिक रूपमा सडक पारी रहेको पदमार्ग प्रयोग गर्न अनुरोध गरेको छ।