महेन्द्रनगर । कञ्चनपुरको उत्तर पश्चिमी क्षेत्र ब्रम्हदेवमा भारतीय सीमा सुरक्षा बल एसएसबीले वृक्षरोपण गर्न रोक लगाएको छ । भीमदत्त नगरपालिका–९ ब्रह्मदेवस्थित सिद्धनाथ सामुदायिक वनले गर्न लागेको वृक्षरोपण र तारबारमा भारतीय पक्षले अवरोध गरेको हो ।
सिद्धनाथ सामुदायिक वनका अध्यक्ष हर्क बहादुर चन्दका अनुसार वन क्षेत्रमा तारबार गर्ने क्रममा आएको एसएसबीको टोलीले सो जमिन भारतको भूमि हो भन्दै धम्क्याएको थियो । एसएसबीले तारबार र वृक्षरोपण नगर्न चेतावनी दिए पनि स्थानीले भने तारबार गरेका छन् ।
ब्रह्मदेव बजार छेउको सीमास्तम्भ गायब हुँदा सो क्षेत्रलाई भारतीयले आफ्नो भन्दै बारम्बार दुःख दिने गरेका छन् ।
स्थानीयका अनुसार टनकपुर ब्यारेजका कारण महाकालीको पानीभित्र सीमास्तम्भ गायब छ तर भारतीय पक्ष महाकाली भन्दा धेरै वारी सम्म नै आफ्नो भन्दै दाबी गर्ने गर्दछ । सो क्षेत्रमा गतवर्ष भारतले सडक निर्माणमा समेत अवरोध गरेको थियो ।
यस्तै, हालै भारतीय एसएसबीले जिल्लाको दक्षिणी क्षेत्र बेलौरी नगरपालिका वडा नं ८ पचुईमा पूर्व–पश्चिम हुलाकी राजमार्ग निर्माण कार्यमा अवरोध गरेको थियो ।
