बुटवल । मूल प्रवाह अखिल भारत नेपाली एकता समाजका नेता बल बहादुर रेश्मीको पार्थिव शरिरमा नेकपा (मसाल) रुपन्देहीका प्रवक्ता लालचन्द पन्थले पार्टीको झण्डा ओढाएर श्रद्धाञ्जली प्रकट गर्नुभएको छ । सहजीकरण दिनेश शर्माले गर्नु भएको थियो भने कर्साघाटमा रेश्मीको अन्तिम संस्कार गरिएको छ ।
अन्तिम संस्कारमा मूल प्रवाहका निवर्तमान अध्यक्ष ठाकुर खनाल, अन्टुक अध्यक्ष लोकराज भुसाल, किसान संघ केन्द्रीय सदस्य शिक्षक संघ केन्द्रिय सल्लाहकार कमला भुसाल लगायत विभिन्न संघसंस्थाबाट सहभागी रहेको थियो ।
रेश्मीको गत राती ८ बजे दिल्लीबाट नेपाल रुपन्देही तामनगर आउने क्रममामा उत्तर प्रदेशको बिजनौर पुग्दा बाटो मै निध्न भएको थियो । उहाँ एकता समाजमा १९८१ मा नयाँ दिल्ली (ओखला एरिया)बाट संगठित भै विभिन्न समितिको जिम्मेवारी वहन गर्दै आउनु भएको थियो ।
रोजगारको क्रममा गुजरातको नजिकै केन्द्र शासित प्रदेश सिलवासमा पुग्नुभएका रेश्मीले त्यहाँ पनि संगठनको विस्तार कार्यमा योगदान पुर्याउनु भएको थियो । उहाँले लामो समय दिल्लीको ओखला औद्योगिक क्षेत्र र फरीदाबादमा काम गर्नुभएको थियो ।
उहाँले प्रवासी नेपालीहरूको हकहितको साथै राष्ट्रियता, जनतन्त्र जनजिविका रक्षाको साथै क्रान्तिकारी परिवर्तनको पक्षमा निरन्तर सकृय हुनुहुन्थ्यो । अहिले पनि उहाँको सम्पूर्ण परिवार संगठनको सकृय कार्यकर्ताको रूपमा कार्यरत हुनुहुन्छ । श्रीमती गुन कुमारी महिला क्षेत्रीय विभागमा, जेठा छोरा विष्णु रेश्मी फरिदावाद नगर कार्यकर्ता र कान्छो छोरा अजय रेश्मी अखिल भारत नेपाली विद्यार्थी संघ केन्द्रीय सल्लाहकार र बुहारी अमृत सांस्कृतिक कार्यकर्ता र नातिनी अस्मिता बालक कलाकारको रूपमा काम गर्नु भएको थियो । रेश्मीको पुरै परिवार कलाकारको रूपमा समेत कार्यरत हुनुहुन्थ्यो ।
रेश्मीलाई २०१५ तिर ब्रेन हेम्रेजको अटैक आएको थियो र प्राईवेट नोकरीबाट स्वेच्छिक अवकाश लिई २०१६ देखि नेपाल आउनु भएको थियो । उहाँ गत सेप्टेम्बरदेखि बिमारी हुनुहुन्थ्यो । केहि दिन बुटवलमा उपचार गराई उपचारको लागि दिल्ली जानुभएको थियो । दिल्लीको होलीफेमली अस्पताल र लाइफ हस्पिटल फरिदाबादमा गरि झन्डै २ महिना आईसियुमा र जनवरीदेखि हिजोसम्म होम केयर युनिट बनाई मूल प्रवाह केन्द्रीय कार्यालयमा उपचाररत हुनुहुन्थ्यो । स्वास्थ्यमा केहि सुधार देखिए पछी नेपालमै (होमकेयरमा) स्वास्थ्य लाभ लिने गरि स्वदेश फर्किदै हुनुहुन्थ्यो ।
