काठमाडौँ । नेपाल पत्रकार महासङ्घले आफ्नो एकहत्तरौँ स्थापना दिवस मनाएको छ ।
२०८२ चैत १६ गते सोमबार काठमाडौँ सिनामङ्गलदेखि प्रभातफेरी सुरु गरी सञ्चारग्राममा औपचारिक कार्यक्रमसँगै स्थापना दिवस मनाएको हो ।
कार्यक्रममा मन्तव्य राख्दै अध्यक्ष निर्मला शर्माले आफूहरूले वर्तमान सरकारका गतिविधि अवलोकन गरिरहेको बताउनुभयो ।
पत्रकारका हक, हित र अधिकार कुण्ठित भएमा आवाज उठाउन महासङ्घ तयार रहेको उहाँले बताउनुभयो ।
त्यस्तै पूर्व अध्यक्ष किशोर नेपालले पत्रकारले पेसागत हकहितको पक्षमा काम गर्नुपर्ने आवश्यकतामा जोड दिनुभयो ।
उहाँले पत्रकार महासङ्घले गुणस्तरीय पत्रकार स्थापनाका लागि पहल गर्नुपर्ने आवश्यकतामा जोड दिनुभयो ।
प्रेस काउन्सिलका अध्यक्ष डा. कुमार शर्मा आचार्यले नयाँ सरकार आएपछि पनि पत्रकारको हक, हित र अधिकारको पक्षमा आवाज उठाइरहने बताउनुभयो ।
पत्रकारप्रति मर्यादित व्यवहार गरिनुपर्नेमा जोड दिँदै उहाँले स्वयम् पत्रकार पनि मर्यादित हुनुपर्ने आवश्यकतामा जोड दिनुभयो ।
महासङ्घका पूर्व अध्यक्ष हरिहर विरहीले पत्रकार महासङ्घजस्तो नागरिक संस्थाको अस्तित्व जहिले पनि आवश्यक रहिरहने बताउनुभयो ।
महासङ्घले लगातार पत्रकारका हक, हित र अधिकारको पक्षमा आवाज उठाएकोमा उहाँले प्रशंसासमेत गर्नुभयो ।
त्यस्तै महासङ्घका केन्द्रीय सल्लाहकार रमेश विष्टले नयाँ सरकारले पत्रकारप्रति असहिष्णु व्यवहार गरेमा प्रतिवाद गर्न सङ्गठनात्मक रूपमा तयारी अवस्थामा रहनुपर्ने बताउनुभयो ।
महासङ्घकी केन्द्रीय सचिव सोनी शर्मा र उपत्यका प्रदेश समितिकिा अध्यक्ष टेनिस रोकाको सञ्चालनमा अघि बढेको उक्त कार्यक्रममा विभिन्न पत्रकार सङ्घसंस्थासमेतका प्रतिनिधिको उपस्थिति रहेको थियो ।
औपचारिक कार्यक्रमपूर्व पत्रकारस्तम्भमा माल्र्यापण तथा पत्रकार सहिदको सम्मानमा एक मिनट मौनधारण गरिएको थियो ।
