काठमाडौं । कोरोना भाइरसको संक्रमणबाट थप एक जनाको ज्यान गएको छ । सुनसरीको धरानस्थित बीपी कोइराला स्वास्थ्य विज्ञान प्रतिष्ठानमा उपचारत कोरोना संक्रमित ६० वर्षीय पुरुषको मृत्यु भएको अस्पतालले जनाएको छ ।

प्रतिष्ठानका अनुसार महोत्तरीका ती व्यक्ति प्रतिष्ठान आउँदा नै सिकिस्त अवस्थामा थिए । सुरुमा आईसीयूमा राखिएकामा पीसीआर परीक्षण गर्दा कोरोना संक्रमण पुष्टि भएपछि उनलाई मंगलबार आइसोलेसनमा सारिएको थियो ।

चिकित्सकका अनुसार उनमा रुघाखोकी र ज्वरो थियो । उनको शवलाई महोत्तरी पठाइसकिएको छ । योसँगै नेपालमा कोरोना संक्रमणबाट मृत्यु हुनेको संख्या ४१ पुगेको छ ।

कोरोना रोकथामका लागि भन्दै सरकारले गत चैत ११ गतेदेखि लागू गरेको लकडाउन खुला गरेको छ । लकडाउन खुलेकै दिन कोरोनाको संक्रमणबाट थप एक जनाले ज्यान गुमाएका हुन् ।

मंगलबार साँझसम्म नेपालमा कोरोना भाइरसबाट संक्रमितको कुल संख्या १७ हजार ९ सय ९४ पुगेको छ । अहिले देशभरीका विभिन्न आईसोलेसनमा ५ हजार ४ सय ७७ जना संक्रमित उपचाररत रहेका छन् ।