काठमाडौँ । अखिल (छैठौं) ले राज्यको सुरक्षा संयन्त्रको कमजोरीका कारण इनिसाजस्ता प्रकरण अगाडि आएको धारणा व्यक्त गरेको छ ।
अध्यक्ष सुवास जिसीको हस्ताक्षरमा २०८२ फागुन २८ गते बिहीबार प्रेसवक्तव्य जारी गर्दै युनियनले सो किटानी गरेको हो ।
सुर्खेतकी कक्षा ११ मा अध्ययनरत किशोरी इनिसाको सामूहिक बलात्कार र हत्या प्रकरणमा युनियनले निष्पक्ष अनुसन्धान गरी अपराधीमाथि कडा कानुनी कारबाही गर्न माग गरेको छ ।
मृतकप्रति भावपूर्ण श्रद्धाञ्जली तथा शोकसन्तप्त परिवारमा गहिरो समवेदना व्यक्त गरिएको उक्त वक्तव्यको पूर्ण पाठ यस्तो छ :
“सुर्खेतको वीरेन्द्रनगरस्थित उषा बालवाटिका विद्यालयमा कक्षा ११ मा अध्ययनरत १६ वर्षीय बालिका इनिसा विकमाथि भएको सामूहिक बलात्कार र जघन्य हत्याको आपराधिक घटनालाई हाम्रो सङ्गठनले घोर भत्र्सना गर्दछ । हामीले घटनाको उच्चस्तरीय छानबिन समिति गठन गरी निष्पक्ष अनुसन्धान गर्न र अपराधीलाई यथाशीघ्र पक्राउ गरी कडा कानुनी कारबाही गर्न सरकारसमक्ष जोडदार माग गर्दछौँ ।
आधुनिक भनिएको समाजमा घट्ने यस प्रकारका अपराधले सिङ्गो समाजको चेतनामाथि गम्भीर प्रश्न उठाइरहेको हुन्छ । विगतका यस्तै प्रकृतिका घटनामा राज्यको सुरक्षा र प्रशासन संयन्त्रको कमजोर अनुसन्धान पद्धति र अपराधीलाई कडा कानुनी सजायको व्यवस्था नगर्नुको परिणाम यस्ता अपराध न्यूनीकरण भइरहेका छैनन् । त्यस्तै युवा तथा विद्यार्थीमा पनि उचित नैतिक चरित्रको विकास गर्न राज्यको पर्याप्त ध्यान जान सकेको छैन । हामीले सरकारसमक्ष यस्ता गम्भीर विषयमा जिम्मेवार बन्न ध्यान आकर्षित गर्दछौँ ।
अन्तमा हामीले मृतक इनिसाप्रति भावपूर्ण श्रद्धाञ्जली अर्पण गर्दै शोकाकुल परिवारजनमा गहिरो समवेदना व्यक्त गर्दछौँ ।”
