तौलिहवा । नेकपा (मसाल) कपिलवस्तु जिल्ला समितिका सदस्य मुक्तिराम न्यौपाने (कृति) को निधन भएको छ ।
२०८२ फागुन २२ गति शुक्रबार राति १० बजेतिर निवासस्थान बाणगङ्गा–४ बाट उपचारको क्रममा अस्पताल लैजाँदै गर्दा उहाँको निधन भएको हो ।
फागुन २३ गते शनिबार बिहान बाणगङ्गा–७ स्थित लक्ष्मणघाटमा उहाँको दाहसंस्कार गरिएको छ । उहाँको स्मृतिमा एक मिनट मौनधारण गरिएपछि मसालको कपिलवस्तु जिल्ला प्रवक्ता माधव भाटक्षेत्रीले पार्थिव शरीरमा कम्युनिस्ट पार्टीको झन्डा ओढाउनुभएको थियो ।
लामो समयसम्म भारतको हिसारमा मूल प्रवाह अखिल भारत नेपाली एकता समाजमा सक्रिय रहनुभएका न्यौपाने नेपाल फर्किएपछि राष्ट्रिय जनमोर्चा कपिलवस्तुको जिल्ला उपाध्यक्ष तथा अखिल नेपाल किसान महासङ्घ (अप्फा) कपिलवस्तुको अध्यक्ष रहिसक्नुभएको थियो ।
मसालका जिल्ला प्रवक्ता भाटक्षेत्रीका अनुसार छिट्टै उहाँको निवासस्थानमा शोकसभा कार्यक्रमको आयोजना गरिने भएको छ ।
न्यौपानेको परिवारमा दुई छोरा र एक छोरी हुनुहुन्छ । श्रीमतीको पहिल्यै निधन भइसकेको थियो ।
