काठमाडौँ । गण्डकी प्रदेशका कास्की, म्याग्दी र नवलपुरबाट बन्नुभएका राष्ट्रिय जनमोर्चाका उम्मेदवारले मतदान गर्नुभएको छ ।
२०८२ फागुन २१ गते बिहीबार कास्कीका रविमोहन ढकाल, म्याग्दीका छेमबहादुर विक, पर्वतका भीमलाल न्यौपाने र नवलपुरका चन्द्र सापकोटाले मतदान गर्नुभएको हो ।
कास्की निर्वाचन क्षेत्र नं. १ का उम्मेदवार ढकालले पोखरा महानगरपालिका–३० त्रिकाङस्थित मतदान केन्द्रमा पुगेर मतदान गर्नुभयो ।
त्रिकाङस्थित सनत–दुर्गा नवज्योति आधारभूत विद्यालयमा कायम गरिएको मतदान केन्द्रमा पुगी उहाँले मतदान गर्नुभएको हो । मतदानपछि उहाँले जनज्योति, सिदेपानी, तारकाङ, सैमराङ, रूपालगायतका मतदान केन्द्रमा अनुगमन गरेको युगदर्शनलाई जानकारी दिनुभयो ।
म्याग्दीबाट उम्मेदवार बन्नुभएका विकले स्थानीय मालिका गाउँपालिकाको वडा नं. ६ दरबाङमा पुगी मतदान गर्नुभयो । दरबाङको जनप्रिय माविमा कायम गरिएको मतदान केन्द्रमा पुगी उहाँले मतदान गर्नुभएको हो ।
पर्वतका राजमो उम्मेदवार न्यौपानेले पनि पैयुँ गाउँपालिका–१ तकलाकबाट मतदान गर्नुभयो । तकलाकस्थित तकलाक माविमा स्थापना गरिएको मतदान केन्द्रमा पुगी उहाँले मतदान गर्नुभएको हो ।
नवलपुर–१ बाट राजमो उम्मेदवार सापकोटाले गैँडाकोट नगरपालिका–६ को भाग्योदय टोलमा पुगेर मतदान गर्नुभएको छ । सो स्थानको भाग्योदय प्रावि मतदान केन्द्रमा पुगी उहाँले मतदान गर्नुभएको थियो । मतदानपछि उहाँले गैँडाकोट नगरपालिकाका १० ओटा वडामा अनुगमन गरिसकेको युगदर्शनलाई जानकारी दिनुभयो ।
