काठमाडौँ । उदयपुर, सिन्धुपाल्चोक, रामेछाप र मकवानपुरका राष्ट्रिय जनमोर्चाका उम्मेदवारहरूले मतदान गर्नुभएको छ ।
उदयुपरका लीलकुमार राई, सिन्धुपाल्चोकका दाबा लामा, रामेछापका अर्जुन थापामगर र मकवानपुरका निरबहादुर सिन्तानले २०८२ फागुन २१ गते बिहीबार मतदान गर्नुभएको हो ।
उदयपुर–१ बाट उम्मेदवार बन्नुभएका राईले त्रियुगा नगरपालिकाको वडा नं. १० स्थित मतदान केन्द्रबाट मतदान गर्नुभएको छ । बोक्सेको बालमन्दिर माविमा कायम गरिएको मतदान केन्द्रमा पुगी उहाँले मतदान गर्नुभएको हो ।
सिन्धुपाल्चोक–१ बाट राजमो उम्मेदवार लामाले पनि मतदान गर्नुभएको छ । लिशङ्खुपाखर गाउँपालिका–१ टाँडीस्थित जनकल्याण माविमा कायम गरिएको मतदान केन्द्रमा पुगेर लामाले मतदान गर्नुभएको हो ।
रामेछापबाट उम्मेदवार बन्नुभएका थापामगरले दोरम्बाशैलुङ गाउँपालिका–७ बाट मतदान गर्नुभएको छ । त्यहाँको श्री भीमेश्वर माविमा कायम गरिएको मतदान केन्द्रमा पुगेर उहाँले मतदान गर्नुभएको हो ।
त्यस्तै मकवानपुर–२ बाट उम्मेदवार बन्नुभएका निरबहादुर सिन्तानले पनि मतदान गर्नुभएको छ । कैलाश गाउँपालिका–५ को वडाकार्यालय चौरीटारस्थित मतदान केन्द्रबाट उहाँले मतदान गर्नुभएको हो ।
