काठमाडौँ । फागुन १८ गते राति १२ बजेपछि सुरु भएको मौन अवधिमा विभिन्न जिल्लाका उम्मेदवारी समस्यामा परेका छन् ।

यस क्रममा धनुषामा एक जनाको उम्मेदवारी खारेज भएको छ† सिराहा र पर्साका उम्मेदवार पक्राउ परेका छन् भने सर्लाहीक एक उम्मेदवार कालोसूचीमा परेका छन् ।

धनुषा

निर्वाचन आयोगले धनुषा क्षेत्र नं. १ का रास्वपा उम्मेदवार किशोर साहको उम्मेदवारी खारेज गरेको छ । बैङ्क तथा वित्तीय संस्थाको कालोसूचीमा रहेको प्रमाण पुगेपछि उनको उम्मेदवारी खारेज भएको आयोगले जानकारी दिएको छ ।

कर्जा सूचना केन्द्रको अद्यावधिक विवरणअनुसार कमल निर्माण सेवा प्रालिका सेयरधनी रहेका किशोर २०८० कालोसूचीमा देखिएका रहेको र विभिन्न मितिमा उनको नाम एकल र संयुक्त रूपमा समेत चेक बाउन्ससम्बन्धी कालो सूचीमा परेकाको विवरणमा उल्लेख रहेको पाइएको हो ।

पर्सा

नेपाली कम्युनिस्ट पार्टी पर्सा क्षेत्र नं. २ का उम्मेदवार मनोज चौधरी बमसहित पक्राउ परेका छन् । पर्साको पर्सागढी नगरपालिका बढनिहारबाट पक्राउ गरिएको जिल्ला प्रहरी कार्यालयले जनाएको छ ।

नौओटा सुतली बम र सुँगुरको टाउकोसहित ३ जनालाई प्रहरीले पक्राउ गरेको छ । चुनावको बेला हिंसा भड्काउने उद्देश्यले सुँगुरको टाउको र सुतली बम बोकेर हिँडेकाहरुलाई प्रहरीले गएराति पक्राउ गरेको हो ।

प्रहरीका अनुसार उनीहरु सुँगुरको टाउको मस्जिदमा लगेर फ्याँक्ने तयारीका साथ हिँडेका थिए । प्रहरीका अनुसार उनीहरूको साथबाट नौ थान सुतली बम, केही तार लगायतका सामग्री पनि बरामद भएको छ ।

सिराहा

प्रतिनिधिसभा निर्वाचनको मुखैमा जनता समाजवादी पार्टी (जसपा) का सिरहा क्षेत्र नं. ३ का उम्मेदवार अशेश्वर यादव पक्राउ परेका छन् । मौनअवधिका बेला यादव नगदसहित पक्राउ परेका हुन् ।

प्रहरीका अनुसार नेपाल–भारत सीमास्थित माडरबाट सिरहा सदरमुकामतर्फ आउँदै गरेको प्र २–०२–००१ च ०८७ नम्बरको स्कारपियो गाडीलाई राति करिब १२:३० बजे शिवचोकमा संयुक्त चेकजाँचका क्रममा रोकेको थियो ।

जाँचका क्रममा गाडीबाट ४ लाख ८७ हजार रुपैयाँ नगद बरामद भएपछि उम्मेदवार यादवसहित पाँच जनालाई नियन्त्रणमा लिइएको जिल्ला प्रहरी कार्यालय सिरहा स्रोतले जनाएको छ । प्रहरीले गाडीबाट मतपत्रसमेत फेला परेको दाबी गरेको छ ।

सर्लाही

सर्लाही–३ मा रास्वपाका उम्मेदवार नरेन्द्र साह कलवार कर्जा सूचना केन्द्रको कालोसूचीमा परेको पाइएको छ । कर्जा सूचना केन्द्रको विवरण अनुसार कलवारलाई पछिल्लोपटक २०८१ मङ्सिर ५ गते केन्द्रले कालोसूचीमा राखेको थियो, जुन अहिलेसम्म कायमै रहेको देखिन्छ ।

यसअघिको निर्वाचनमा माओवादी केन्द्रबाट उम्मेदवार रहेका उनी एमालेका हरिप्रसाद उप्रेतीसँग झिनो मतान्तरमा पराजित भएका थिए ।

अहिले उनी रास्वपाबाट उम्मेदवारी दिएका छन् ।