काठमाडौँ । जेनजी आन्दोलनको नाममा गत भदौ २४ गते सर्वोच्च अदालत, सिंहदरबारजस्ता महŒवपूर्ण निकायमा तोडफोड र आगजनीमा संलग्न १३ जना विरुद्ध मुद्दा दर्ता भएको छ ।

जिल्ला सरकारी वकिलको कार्यालय काठमाडौँले उपत्यकाभित्रका प्रहरी कार्यालय, अदालत र सिंहदरबारमा आगजनी गर्ने विरुद्ध मुद्दा दायर भएको हो।

काठमाडौँ जिल्ला अदालतका सूचना अधिकारी दीपक श्रेष्ठका अनुसार सिंहदबारमा तोडफोड तथा आगजनीमा संलग्न आशिष गुरुङ विरुद्ध आपराधिक उपद्रो र डाँकासम्बन्धी कसुरमा मुद्दा दायर भएको छ ।

त्यस्तै सर्वोच्च अदालत जलाउनेहरू सुनिल श्रेष्ठ, ज्योति थापा, विनोदकुमार थापामगर, कुमार पराजुली र राजु परियार विरुद्ध मुद्दा दायर भएको छ । श्रेष्ठका अनुसार उनीहरूलाई आपराधिक उपद्रो मच्चाएको अभियोग लगाइएको छ ।

सर्वोच्च अदालतले भदौ २४ गतेको घटनामा संलग्नमाथि अनुसन्धान गरी कारबाहीको माग गर्दै काठमाडौँ प्रहरी परिसरमा जाहेरी दिएको थियो । जाहेरीका आधारमा गरिएको अनुसन्धानबाट उनीहरू विरुद्ध मुद्दा चलाइएको हो ।

श्रेष्ठ, थापामगर, पराजुलीसहितका प्रतिवादीले सर्वोच्च अदालतमा आगजनी गरेर एक अर्ब २३ करोड ६२ लाख ३८ हजार रुपैयाँमा बराबरको क्षति पुर्‍याएको अभियोगपत्रमा उल्लेख छ ।

त्यस्तै प्रहरी वृत्त बौद्ध जलाएको आरोपमा समीर श्रेष्ठ र सुनिल तामाङ विरुद्ध मुद्दा चलाइएको छ । प्रहरी प्रभाग बलम्बु तोडफोड गरेको अभियोगमा निखिल कुसुले, सोहन चौधरी, विवेक रोक्का र छत्रबहादुर विक विरुद्ध पनि मुद्दा चलाइएको छ ।

प्रतिवादी सबैलाई अहिले सरकारी वकिल कार्यालयले हाजिर जमानीमा रिहा गरेको छ । अब उनीहरू विरुद्ध अदालतबाट म्याद जारी हुनेछ ।

सरकारी वकिल कार्यालयले विष्णुप्रसाद ढुङ्गेल विरुद्ध भने मुद्दा नचलाउने निर्णय गरेको छ । उनी घटनास्थलमा उपस्थित भएको भिडियो तथा अन्य प्रतिवादीले पोल नगरेको भन्दै मुद्दा नचलाउने निर्णय गरिएको हो ।