चेन्नई । मूल प्रवाह अखिल भारत नेपाली एकता समाजले प्युठान र रोल्पाका दुई नेपाली किशोरको उद्धार गरेको छ ।
चेन्नई पश्चिम नगर समितिमा आएको निवेदनअनुसार दक्षिण भारत क्षेत्रीय सचिवालय सदस्य तथा चेन्नई पश्चिम नगर अध्यक्ष बुद्धिराम पौडेल र क्षेत्रीय सदस्य तथा चेन्नई पश्चिम नगर सचिव किशोर शर्माको सक्रियतामा उनीहरूको उद्धार गरिएको हो ।
उद्धार गरिएका किशोरमा एक जना प्युठान स्वर्गद्वारी नगरपालिका बेलबासका १५ वर्षीय भरत जिएम हुन् भने अर्का बालक रोल्पा सुनिलस्मृति गाउँपालिका–८ निवासी १३ वर्षीय अर्जुन चुनारा हुन् ।
जिएमलाई फेबु्रअरी २५, २०२६ का दिन निजका आफन्त वीरबहादुर जिएमको अनुमतिमा थम्मन जिएमलाई हस्तान्तरण गरिएको छ ।
अर्का बालक चुनारालाई मार्च ३ का दिन उनका बाबु हेडवीरसिंह चुनारालाई जिम्मा लगाइएको छ ।
यी बालकलाई केही महिनापहिला हाउसमेडको रूपमा चेन्नई परशुवाक्कम, ओटरीस्थित एक मारवाडीको घरमा काममा लगाइएको थियो ।
मूल प्रवाहको प्रतिनिधिमण्डल त्यहाँ पुगेर जानकारी लिँदा थोरै ज्याला र अधिक काम, कमसल खालको रासनपानी, घरमूलीबा अत्याचार, बाहिर जानमा रोक, फोन गर्दा हस्तक्षेपलगायतका मानसिक तनावले गर्दा उनीहरू भागेर जाने प्रयास गरेको पाइएको थियो ।
प्रतिनिधिमण्डलसँगको वार्तापछि अन्तत: घरमूली झुक्न बाध्य भएको थियो । त्यस क्रममा ती दुवै बालकको पारिश्रमिकबापतको हिसाबकिताब मूल प्रवाह, घरमूली र पीडितका आफन्तजनको रोहबरमा गरिएको थियो ।
दुवै बालकलाई मुक्त गरिएपछि निजकका अभिभावकले मूल प्रवाहलाई धन्यवाद ज्ञापन गरेको जानकारी प्राप्त भएको छ ।
