काठमाडौँ । फागुन १६ गते बिहान १० देखि १७ गते बिहानसम्म देशभर कुल २३ ओटा विपद्का घटना घटेका छन् ।
राष्ट्रिय बिपद जोखिम न्यूनीकरण प्राधिकरणका अनुसार त्यसमध्ये २२ ओटा घटना आगलागीसँग सम्बन्धित थिए, एउटा मात्रै पहिरोको घटना थियो ।
सामान्य सावधानी अपनाउँदासमेत जोगिन सकिने आगलागीका कारण धनमालको क्षति भएको प्राधिकरणले जनाएको छ ।
बिपदमा परेर एक जनाको ज्यान गएको छ भने पाँच जना घाइते भएका छन् । बिपदका कारण रु ५२ लाख ४५ लाख बराबरको क्षति भएको छ ।
प्राधिकरणका अनुसार पाँचथर, झापा, मोरङ, सुनसरी र धनकुटामा आगलागी भएका छन् । त्यस्तै, सप्तरी, धनुषा, पर्सा र कैलालीका दुई स्थानमा आगलागीका घटना हुँदा सर्लाही, धनुषा, मकवानपुर, काभ्रेपलाञ्चोक, काठमाडौँ, गोरखा, लमजुङ, पाल्पा र प्युठानका एक/एक स्थानमा आगलागी भएका छन् ।
बिजुलीको तार सर्ट भएको तथा दियो बालेर त्यत्तिकै छाडेका कारण आगलागी भएको जनाइएको छ ।
हिउँदमा सुक्खा बढी हुनाले आगलागीका घटनामा वृद्धि हुने हुँदा विशेष सावधानी अपनाउन प्राधिकरणले आग्रह गरेको छ ।
फागुन १६ गते कुल आठओटा बिपदका घटनामध्ये सातओटा आगलागीका मात्रै थिए । फागुन १५ गते प्राधिकरणमा दर्ता भएका कुल १९ ओटा घटनामध्ये १७ ओटा घटना आगलागीका थिए । यस आधारमा देशभर आगलागीका घटनामा वृद्धि भएको पाइएको छ ।
