शङ्करप्रसाद पोख्रेल, बुटवल ।
राष्ट्रिय जनमोर्चाका अध्यक्ष तथा समानुपातिक उम्मेदवार चित्रबहादुर केसीले आगामी निर्वाचनमा गिलास चुनाव चिह्नमा मत दिएर विजयी गराउन आम नेपाली जनतासित आह्वान गर्नुभएको छ ।
कावा अध्यक्ष रश्मिराज नेपालीसमेतको उपस्थितिमा २०८२ फागुन १७ गते आइतबार रुपन्देहीको खैरेनीचोकमा आयोजित चुनावी सभालाई सम्बोधन गर्दै अध्यक्ष केसीले देशको राष्ट्रियता, लोकतन्त्र तथा गणतन्त्रको रक्षा गर्न राजमोको जित आवश्यक रहेको बताउनुभयो ।
उहाँले राजमो स्थापनाकालदेखि नै भ्रष्टाचार, विकृति र विसङ्गति विरुद्ध निरन्तर सङ्घर्षरत रहेको उल्लेख गर्दै सङ्घीयता खारेजीको मुद्दालाई दृढतापूर्वक उठाउँदै आएको स्मरण गर्नुभयो ।
‘देशलाई कमजोर बनाउने संरचना र नीतिका विरुद्ध राजमोले निरन्तर आवाज उठाएको छ’ उहाँले भन्नुभयो– ‘राष्ट्रको स्वाधीनता र जनताको अधिकारको रक्षा गर्न सक्षम शक्ति राजमो मात्रै हो ।’
अध्यक्ष केसीले विदेशी शक्तिको प्रभावमा सञ्चालन भइरहेका दलले सत्ता हात पारे देश गम्भीर सङ्कटतर्फ धकेलिन सक्ने चेतावनी दिनुभयो ।
नेपाललाई अन्तर्राष्ट्रिय शक्तिसङ्घर्षको मैदान बन्न नदिन सचेत नागरिकले सही निर्णय लिनुपर्ने धारणा व्यक्त गर्दै उहाँले गलत शक्ति विजयी भए देश युक्रेनजस्तै द्वन्द्वग्रस्त अवस्थातर्फ जान सक्ने बताउनुभयो ।
कार्यक्रममा रुपन्देही निर्वाचन परिचालन समितिका मूल संयोजक तथा समानुपातिक उम्मेदवार लीलबहादुर केसीले नेपालमाथि विदेशी शक्तिको ठाडो हस्तक्षेप बढ्दै गएको आरोप लगाउनुभयो ।
उहाँले राष्ट्रिय स्वाभिमान जोगाउन राष्ट्रवादी शक्तिलाई बलियो बनाउन आवश्यक रहेको उल्लेख गर्दै राजमो त्यसको विश्वसनीय विकल्प भएको विचार व्यक्त गर्नुभयो ।
त्यसैगरी रुपन्देही क्षेत्र नं. १ का प्रतिनिधिसभा सदस्य उम्मेदवार हरिबहादुर केसीले आफूलाई जनताको सेवकका रूपमा काम गर्ने अवसर दिन आग्रह गर्नुभयो ।
उहाँले जनताको समस्या समाधान, विकास निर्माण तथा सुशासन स्थापनाका लागि आफू प्रतिबद्ध रहेको बताउँदै गिलास चिह्नमा मतदान गरी विजयी गराउन मतदातासँग अपिल गर्नुभयो ।
सभाका अन्य वक्ताले राष्ट्रियता, जनजीविका र सुशासनका मुद्दालाई केन्द्रमा राख्दै आगामी निर्वाचनमा राजमोलाई बलियो शक्ति बनाउनुपर्नेमा जोड दिनुभएको थियो ।
कार्यक्रमको सञ्चालन नेकपा (मसाल) रुपन्देहीका प्रवक्ता लालचन्द पन्थले गर्नुभएको थियो ।
