काठमाडौँ । अन्तर्राष्ट्रिय नेपाली एकता समाजले खाडी क्षेत्रका नेपालीको सुरक्षामा ध्यान दिन सरकारसित अनुरोध गरेको छ ।
अध्यक्ष शक्तमान बुढाथोकीको हस्ताक्षरमा २०८२ फागुन १६ गते शनिबार प्रेसवक्तव्य जारी गर्दै समाजले सो अनुरोध गरेको हो ।
अमेरिकाले इरानमाथि गरेको आक्रमणको परिणामस्वरूप खाडी क्षेत्रमा उत्पन्न भएको असहज परिस्थितिमाझ समाजले उच्च स्तरको सतर्कता अपनाउन आग्रह गरेको छ ।
साम्राज्यवाद युद्धको स्रोत भएको उल्लेख गर्दै समाजले आफूहरूले इरानी जनता र विश्वभरिका युद्धविरोधी जनताको पक्षमा रहेकोसमेत स्पष्ट पारेको छ ।
यस्तो छ, प्रेसवक्तव्यको पूर्ण पाठ :
“१. अमेरिकी साम्राज्यवाद र त्यसको जुनियर पार्टनर इजरायली विस्तारवादले आफ्नो कठपुतली सरकार गठन गर्नेलगायतका योजनाअनुरूप इरानमाथि आक्रमण गरेको छ । त्यस क्रममा त्यहाँको विद्यालयमा समेत आक्रमण भएको सञ्चारमाध्यमले उल्लेख गरेका छन् । फलस्वरूप अहिलेसम्म चार दर्जनभन्दा बढी विद्यार्थीको हत्या भएको छ । त्यसको प्रतिवादस्वरूप इरानले अमेरिकी सैन्यक्याम्प रहेका खाडी क्षेत्रका विभिन्न देशमा आक्रमण गरेको छ ।
२. साम्राज्यवाद सबै प्रकारका अन्यायपूर्ण युद्धको स्रोत हो । अहिले अमेरिकी साम्राज्यवादले संसारभरि युद्धको खेती गरिरहेको छ । जबसम्म साम्राज्यवाद रहन्छ, तबसम्म विश्वभरि अन्यायपूर्ण युद्ध भइरहनेछन् । हाम्रो सङ्गठन इरानी जनता र विश्वभरिका न्यायप्रेमी तथा शान्तिप्रेमी जनताको साम्राज्यवाद विरोधी आवाजप्रति ऐक्यबद्धता प्रकट गर्दछ ।
३. युद्धका कारणले खाडी क्षेत्रमा असामान्य अवस्था उत्पन्न हुने खतरा बढेको छ । यस्तो अवस्थामा सम्पूर्ण युद्धप्रभावित देशका नेपालीसित उच्च प्रकारको सतर्कता अपनाउन, असहज परिस्थिति आइपर्दा आपसमा सूचना आदानप्रदान गर्न, आवश्यकताअनुसार उद्धार, राहतका लागि समेत तयार रहन आग्रह गर्दछौँ ।
४. विदेशस्थित नेपालीप्रतिको जिम्मेवारी, उत्तरदायित्व र अभिभावकत्व नेपाल सरकारको हुने भएकाले नेपाल सरकार, परराष्ट्र मन्त्रालय र प्रभावित देशका राजदूताबासमार्फत सम्बन्धित देशका नेपालीको सुरक्षा र आवश्यक राहत, उद्धारजस्ता कार्यका लागि तयार रहन अनुरोध गर्दछौँ ।”
